Turkiya milliy terma jamoasi bosh murabbiyligidan ozod etilgan italiyalik mutaxassis Vinchenso Montella ijtimoiy tarmoqlardagi sahifasi orqali xayrlashuv murojaatini e’lon qildi.
9-oktabr kuni 52 yoshli mutaxassisning Turkiya terma jamoasi bosh murabbiyligidan ketgani rasman ma’lum qilingan edi.
«Har bir go‘zal hikoyaning bir kuni yakuni bo‘ladi. Ammo ayrim sayohatlar futboldan ham muhimroq iz qoldiradi. Turkiya terma jamoasini boshqarish men uchun katta sharaf bo‘ldi.
Uch yil avval menga ushbu ajoyib mamlakat milliy jamoasini boshqarish ishonib topshirildi. Menga ishongan, qo‘llab-quvvatlagan va bu yo‘lni boshlashimga yordam bergan Turkiya futbol federatsiyasining sobiq prezidenti Mehmet Buyukekshi hamda uning hamkasblariga samimiy minnatdorlik bildiraman.
Futbolchilarga fidoyiligi, mehnatsevarligi va terma jamoaga sadoqati uchun alohida rahmat aytmoqchiman. Faoliyatim yakunlanganidan keyin ularning ko‘pchiligi yo‘llagan iliq so‘zlar o‘rtamizda qanchalik mustahkam munosabatlar shakllanganini yana bir bor ko‘rsatdi.
Murabbiylar shtabim va barcha xodimlarga kundalik mehnati uchun, federatsiyaning amaldagi prezidenti Ibrohim Ethem Hajiusmono‘g‘li hamda Turkiya futbol federatsiyasiga bildirilgan ishonch uchun minnatdorman. Albatta, butun dunyo bo‘ylab bizni qo‘llab-quvvatlagan, cheksiz ishtiyoqi bilan kuch bag‘ishlagan muxlislarimizga ham rahmat.
Biz birgalikda unutilmas lahzalarni boshdan kechirdik, tarixiy natijalarga erishdik, qiyinchiliklarni yengib o‘tdik va mamlakat futboli tarixining o‘ziga xos sahifasini yaratdik. Bu xotiralar hamda turk xalqining menga ko‘rsatgan mehrini bir umr qalbimda saqlayman.
Futbol faqat natijalar va sovrinlardan iborat emas. Ishonchim komilki, murabbiy mamlakatni tark etganidan keyin odamlarning unga bo‘lgan munosabati ham maydondagi yutuqlari kabi muhimdir.
Umid qilamanki, futbolchilar va murabbiylar shtabi bilan birgalikda ulashgan hissiyotlarimiz tufayli turk xalqi meni mehr va hurmat bilan eslaydi. Rahmat, Turkiya! Sen doimo yuragimda qolasan»,
— deb yozdi Montella.
Italiyalik mutaxassis Turkiya terma jamoasini 2023-yildan buyon boshqarib kelayotgan edi. Uning qo‘l ostida jamoa Yevro-2024 chorak finaliga qadar yetib borgan.
🏦O‘zbek va jahon sportiga oid eng so‘nggi yangiliklar: @Uzasport