Afg'onistonga yuklarni konteynerlarda yopiq vagon maqomida eksport qilish jarayoniga rasman start berildi

Bugun O‘zbekiston Respublikasining logistika salohiyatini yanada oshirish, konteynerlarni maxsus shartlarda tashuvlarini rivojlantirish hamda qo‘shni davlatlar bilan savdo-iqtisodiy aloqalarni mustahkamlash yo‘lida muhim amaliy qadam tashlandi.

Xususan, "Temiryo‘lkargo" AJ tashabbusi bilan O‘zbekistonda ishlab chiqarilgan un mahsulotlarini Afg‘oniston bozoriga konteynerlar orqali maxsus shartlarda (tarif narxlari yopiq vagon orqali tashish narxiga tenglashtirilgan) eksport qilish jarayoniga rasman start berildi.

Mazkur loyiha doirasida "Temiryo‘lkargo" AJ Multimodal va yuk terminallari bo‘limi boshlig‘i O.U. Raxbarov, Toshkent filiali boshlig‘i T.N. Nurillayev hamda Chinoz temir yo‘l bekati boshlig‘i B. Xodimatov hamkorligida Afg‘onistonga mo‘ljallangan un mahsulotlarini konteynerlarga yuklash va jo‘natish ishlari muvaffaqiyatli amalga oshirildi.

Eksport yuklarini konteynerlarda tashish yuklarning butligini va xavfsizligini ta'minlaydi, ularni tashqi ta'sirlardan ishonchli himoya qiladi, ortish-tushirish jarayonlarini tezlashtiradi hamda yuklarni belgilangan manzilga qisqa muddatlarda va sifatli yetkazib berish imkonini yaratadi.

Mazkur tashabbus nafaqat O‘zbekistonning eksport salohiyatini oshirishga, balki Afg‘oniston yo‘nalishida zamonaviy multimodal logistika xizmatlarini keng joriy etish, yuk tashish samaradorligini yuksaltirish va xalqaro transport koridorlaridan yanada samarali foydalanishga xizmat qiladi.

"Temiryo‘lkargo" AJ multimodal operator sifatida kelgusida Afg‘oniston yo‘nalishida konteyner tashuvlari hajmini bosqichma-bosqich oshirish hamda ushbu yo‘nalishda muntazam konteyner poyezdlari harakatini yo‘lga qo‘yishni rejalashtirmoqda.

#⃣web sayt ❤️‍🔥linkedin.com ❤️‍🔥instagram ❤️‍🔥facebook