Петропавлда заңсыз орнатылған гараждың иесі анықталды

Петропавл қаласының Бостандық көшесіндегі мемлекеттік жерге орнатылған бос гараждың иесі анықталды. Оның маңына үнемі қоқыс жиналатыны туралы қоғам белсенділері мен қала әкімдігінен полицияға арыз түскен болатын. Тексеру барысында гараж иесінің ұзақ уақыт бойы шетелде тұрғаны белгілі болды, тәртіп сақшылары мүмкіндік туған кезде онымен кездесіп, гаражды үш күн ішінде алып тастау қажеттігін хабарлады.

Талап орындалмаған жағдайда, мемлекеттік жер учаскесін заңсыз иеленгені үшін жер ресурстарын басқару департаменті тарапынан ірі көлемде айыппұл салынуы мүмкін. Қазіргі уақытта Петропавлда заңсыз орнатылған гараждарды жою жұмыстары "Таза Қазақстан" акциясы аясында қарқынды жүргізілуде. Жыл басынан бері Солтүстік Қазақстан облысында абаттандыру ережелерін бұзудың 12 500-ден астам дерегі анықталды.