✈️ Aviakompaniya bagajingizni yo‘qotib qo‘ysa nima qilish kerak?

Agar samolyot qo‘nganidan keyin chamadoningiz bagaj lentasida ko‘rinmasa, eng muhimi — vahimaga tushmang va darhol harakat qiling.

1. Bagajni olish hududini tark etmang.
Lost & Found xizmati yoki aviakompaniya vakiliga murojaat qiling.

2. PIR (Property Irregularity Report) dalolatnomasini to‘ldiring.
Bu bagajning kechikishi, yo‘qolishi yoki shikastlanganini tasdiqlovchi rasmiy hujjatdir. Ushbu hujjatsiz bagajni qidirish yoki kompensatsiya olish ancha qiyin bo‘ladi.

3. Kerakli hujjatlarni tayyorlang.
Odatda quyidagilar talab qilinadi:
• xorijga chiqish pasporti;
• bortga chiqish taloni (boarding pass);
• parvozga ro‘yxatdan o‘tishda berilgan bagaj yorlig‘i.

4. Murojaat raqamini oling.
Ushbu raqam orqali bagajni qidirish holatini kuzatib borishingiz mumkin.

5. Barcha hujjatlarni saqlab qo‘ying.
Masala to‘liq hal bo‘lmaguncha PIR dalolatnomasi nusxasi, bortga chiqish taloni va bagaj yorlig‘ini tashlab yubormang.
📦 Aksariyat hollarda kechikkan bagaj bir necha kun ichida topilib, egasiga yetkazib beriladi.

💡 Safardan oldin foydali tavsiyalar:
• Chamadoningizga ism-familiyangiz, telefon raqamingiz va elektron pochta manzilingiz yozilgan yorliqni biriktiring.
• Chamadoningizni tashqi tomondan suratga oling — bu aeroport xodimlariga uni tezroq topishga yordam beradi.
• Pul, hujjatlar, dori-darmonlar, elektron qurilmalar va boshqa qimmatbaho buyumlarni doimo qo‘l yukida olib yuring.

#sugurta #ozbekiston #sugurta #Uzbekistan #sayohat #bagaj #sayohattavsiyalari