ШАРМАНДАГА ШАҲАР КЕНГ!
 
Машҳур блогер MR Beast Самарқандда. Уни кўриш, у билан суратга тушиш, бир оғиз гапини эшитиш учун тўпланган мухлислар...
 
Албатта, машҳур инсонни кўришга қизиқиш табиий. Аммо бир биз кимнидир ҳурмат қилиш билан унга кўр-кўрона сиғиниш ўртасидаги чегарани йўқотиб қўймаяпмизми?
 
Бир инсоннинг ортидан югуриш, уни кўриш учун ўзини ҳар томонга уриш, одамлар орасида тартибни унутиш, ўз қадрини ҳам, ўзгаларнинг ҳаққини ҳам ўйламаслик бу шунчаки мухлислик эмас. Бу фанатизмнинг хавотирли кўриниши.
 
Масала MR Beastда эмас. Масала бизда! У машҳур блогер. Миллионлаб обуначилари бор, видеолари кўпчиликка қизиқ. Бунга эътироз йўқ. Аммо унинг машҳурлиги уни биздан устун инсонга айлантирмайди. У ҳам оддий инсон. Унинг ютуғига ҳавас қилиш мумкин, фаолиятидан илҳом олиш мумкин. Лекин унинг олдида ўзлигимизни йўқотиш шарт эмас.
 
Энг ташвишлиси, бугун айрим ёшлар кимнинг гапи фойдали, кимнинг фикри ибратли, кимнинг меҳнати жамиятга наф келтираётганини таҳлил қилишдан кўра, кимнинг обуначиси кўплигига кўпроқ аҳамият бераётгандек.
 
Миллионлаб обуначи доимо миллионлаб фойдали фикр дегани эмас. Машҳурлик маънавий юксакликнинг ўлчови ҳам эмас.
 
Биз ёшларимизга машҳурларга эргашишни эмас, уларнинг нимасига эргашаётганини англашни ўргатишимиз керак.
 
Кимдир пул тарқатади, олқишлаймиз. Кимдир кўнгилочар видео қилади, томоша қиламиз. Аммо жамият учун жимгина меҳнат қилаётган олим, устоз, шифокор, китоб ёзаётган зиёли ёки қишлоғида болаларга таълим бераётган муаллимга ҳам шунча эътибор бера оламизми?
 
Гап блогерни ёмонлашда эмас. Гап қадриятларимиз ва устуворликларимиз ҳақида.
 
Самарқанд — минг йиллик тарих, илм-маърифат ва юксак маданият шаҳри. Бу заминдан буюк мутафаккирлар етишиб чиққан. Шундай шаҳарда меҳмонни ҳурмат билан кутиб олиш бошқа, унинг атрофида ўзини йўқотиб қўйиш бошқа.
 
Меҳмонни ҳурмат қилиш — фазилат. Ўз қадрингни унутиб, кимнингдир соясига айланиш эса фазилат эмас.
 
Бугун MR Beast атрофида тўпланган мухлислар ҳақида гапирар эканмиз, уларни ҳақорат қилишга шошилмайлик. Балки бу манзара ота-оналар, мактаблар ва жамият учун ҳам бир сигналдир. Ёшларимизга танқидий фикрлашни, шахсий қадр-қимматни, оммага эргашишдан олдин ўйлашни ўргатяпмизми?
 
Зеро, тарбияли инсон машҳурликка маҳлиё бўлиб, ўзлигини йўқотмайди. У кимни ҳурмат қилишни ҳам, нима учун ҳурмат қилишни ҳам билади.
 
Шармандага шаҳар кенг эмас. Шаҳар ҳам, дунё ҳам кенг. Аммо инсоннинг қадри ўз қўлида. Уни бошқанинг машҳурлигига алмаштириб қўймайлик!

✅ @Samarqand_live – Юзинг қийшиқ бўлса ойнадан ўпкалама!