أحد انجازاتي للأشهر السابقة
هو أنو بحثت عن موضوع
"ارتباط الضغط النفسي مع الأمراض الخطيرة كالسرطان"
طبعًا صديقتي روان هي إلي بلشت البحث وآني كلت اشارك وياها
كمختصر مبسط للموضوع حتىٰ ما أعقدة
بجسمنا اكو هرمون أسمة هرمون الكورتيزول إلي هو هرمون التوتر والقلق
هذا المفروض يكون بمستويات طبيعية بسيطة حتىٰ لو يرتفع فترة زمنية قصيرة ويرجع طبيعي
لكن بوجود التوتر المستمر والضغط النفسي
مثل جلد الذات التأثر من الآخرين
أي شيء ممكن يؤثر بالجهاز العصبي للانسان
هذا الشيء يسبب ارتفاع هرمون التوتر بشكل دائم
نوكف هنا
وشوية نروح بداخل داخل جسمنا
كريات الدم البيض إلي احنا ندري بيها تكون دفاعية ، لكن تدافع ضد شنو؟
تدافع ضد الخلايا السرطانية
يعني تخيلوا حُراس موجودين كلما خلية سرطانية تريد تتغذىٰ من جسمنا الحُراس يطردونها وهذا هو شغلها الدائمي
لكن مع ارتفاع مستويات هرمون التوتر
هذول الحُراس يصير بيهم خمول وكسل
فصعب يطردون الخلايا السرطانية
بالتالي هذا الشيء يزيد من دخول الخلايا السرطانية للجسم
وبعدين اصابة الجسم بالسرطان بأحد الأماكن إلي دخل الها
المفترض والمطلوب شنو؟
انو نحافظ علىٰ مستويات معتدلة من القلق و التوتر والضغط النفسي
لأن فعليًا هذا الموضوع يتطلب وعي كامل لشنو كاعد تسببون لنفسكم