Garchi yuzlansam-da qaro zulmatga,
Mudhish azoblarning qa'rida turib.
Ming shukur aytaman shunday qismatga,
Aslo taslim bo'lmas ruhimni ko'rib!
Balolar tig'idan to'ksam-da men qon,
Titramadim aslo, chekmadim faryod.
Taqdir zarbalari qiynasa yomon,
Yarador bo'lsam-da, bo'lmadim barbod!
Yovuzlik va ko'z yoshlar-la qoplangan bu yo'l,
Kelajak manzili bo'lsa-da mavhum.
Boshga dardu sitam yog'sa misli do'l,
Aslo men qo'rqmasman, bo'lmasman mahkum!
Taqdir darvozasi bo'lsa hamki tor,
Xatarlar qalbimga sololmas titroq.
Qismatim ustidan men o'zim sardor,
Shu ozod ruhimning darg'asiman mutloq!
βUilyam Ernst Xenli
ββββββββββββββ
Bu she'r inson irodasining qismat ustidan qozongan g'alabasi ramzi sifatida qabul qilinadi.
Uilyam Ernest Xenli mazkur she'rni 1875-yilda, 26 yoshida yozgan. U bolaligidan suyak sili kasalligidan aziyat chekkan va natijada shifokorlar uning bir oyog'ini kesib tashlashga majbur bo'lishgan. Ikkinchi oyog'ini saqlab qolish uchun qilingan murakkab operatsiyalardan so'ng, uzoq vaqt kasalxonada, qattiq og'riqlar ichida yotgan paytida aynan shu she'rni yozgan.
Bundan tashqari, mazkur she'r Janubiy Afrika Respublikasining sobiq prezidenti Nelson Mandelaning eng sevimli she'ri bo'lgan. Mandela Robben orolidagi qamoqxonada 27 yil davomida tutqunlikda bo'lganida, ushbu she'rni matnini qog'ozga ko'chirib, kamerasi devoriga ilib qo'ygan. U og'ir jismoniy mehnat va siyosiy bosimlar vaqtida o'z irodasini mustahkamlash va safdoshlarining ruhiyatini ko'tarish uchun "Invictus"ni doimo o'qib bergan.
Tarjimon: Mahmudjon Tohirov