«СК-Фармация» сатып алуларындағы талаптар бәріне бірдей болуы тиіс

Құрылтай депутаты, «Ақ жол» фракциясының мүшесі Асылхан Қожахметов отандық фармацевтика өндірушілерінің шағымдары бойынша депутаттық сауал жолдады.

Партияға жүгінген «DOLCE» ЖШС-нің мәліметінше, «СК-Фармация» сатып алуларында отандық өндіруші мәртебесін растау талаптары біркелкі қолданылмайды: кейбір қатысушылардан растайтын құжаттар міндетті түрде сұралса, басқаларынан талап етілмейді немесе кейін сұралады.

Кәсіпкерлердің шағымдарын сол шағым жасалған ұйымның өзіне қарауға жіберу тәжірибесі де алаңдаушылық туғызады. Фракция мұндай өтініштер бойынша тәуелсіз әрі объективті тексеру жүргізілуі қажет деп санайды.

«Ақ жол» фракциясы:

• сатып алу талаптарын барлық қатысушыға бірдей қолдануды;
• жосықсыз қатысушылар тізіліміндегі компаниялардың сатып алуға қатысуына құқықтық баға беруді;
• 2027 жылға арналған медициналық бұйымдарды сатып алудың заңдылығын тексеруді, бұзушылықтар анықталса, сатып алу нәтижелерін жоюға және кінәлілерді жауапкершілікке тартуға дейінгі шаралар қабылдауды;
• шағымдарды әрекетіне шағым жасалған ұйымның өзіне қайта жолдау не тоқтатуды талап етті.

Өндіріске қаржы салып, жұмыс орындарын ашқан отандық кәсіпорындарға тең мүмкіндік берілуі керек. Бюджет пен МӘМС қаражатына жүргізілетін сатып алулардың ашықтығы — ортақ мүдде.