«Ақ жол»: 250-ден астам жұмыскері бар кәсіпорынның бәрі ірі бизнес пе?

Қолданыстағы тәртіп бойынша жұмыскерлерінің жылдық орташа саны 250-ден асатын кәсіпорын кірісі ірі бизнес деңгейіне жетпесе де, осы санатқа жатқызылады. Алайда жұмыскерлер саны кәсіпорынның нақты экономикалық ауқымын көрсете бермейді.

«Ақ жол» Демократиялық партиясының фракциясы ірі бизнесті анықтау өлшемдерін қайта қарауды ұсынды. Негізгі көрсеткіштер ретінде жиынтық жылдық кіріс пен активтердің құнын алып, жұмыскерлер санын дербес өлшем ретінде қолданудан бас тарту қажет.

Сондай-ақ тек жұмыскерлер санына байланысты ірі бизнеске жатқызылған кәсіпорындарды орта бизнес санатына ауыстырудың әсерін бағалап, талдау нәтижесінде Кәсіпкерлік кодекске өзгерістер енгізу ұсынылды.

Мақсат — кәсіпорынның нақты көлемін әділ бағалау. Жаңа жұмыс орындарын ашу бизнеске қосымша талаптар қоюға негіз болмауы тиіс.