A. Lentulov. "Poyezd benen kópir". 1918-jıl. kenep, maylı boyaw.

Aristarx Lentulov "Poezd benen kópir" shıǵarmasında ádettegi qala kórinisi qalayınsha jarqın hám ózine tán kórkem óner shıǵarmasına aylanıwı múmkinligin kórsetedi.

Temir jol kópiri, poezd, sızıqlar hám reńlerdiń úylesimi shıǵarmada háreket sezimin oyatadı. Shıǵarmada súwretlengen barlıq nárse úzliksiz ózgeriw procesinde bolıp xudojniktiń maqseti átiraptaǵı álemniń haqıyqıy kórinisin anıq sáwlelendiriw emes, onı basqa nárse - reń, kórinis hám kompoziciya quralında óz dáwiriniń ruwxı hám ishki sezimin kórsetiw qızıqtıradı.

Bunday jantasıw XX ásir baslarındaǵı rus avangard kórkem ónerine tán edi. Sol dáwir xudojnikleri dástúriy kórkem kózqaraslardan sheginip, dúnyanı jańasha túsiniw hám súwretlew usılların izley basladı.

Búgingi kúnde Ózbekstan mámleketlik kórkem óner muzeyi kollekciyasına tiyisli bul shıǵarma Nókis qalasında "Ózbekstan: sahradaǵı avangard" kórgizbesinde kórsetilmekte.

Aradan júz jıldan aslam waqıt ótken bolsa da, xudojnik Lentulovtıń bul shıǵarması óziniń jarqın reńleri, kórkemlik kúshi hám ádettegidey nárselerge basqasha kózqarası menen elege shekem tamashagóydi tań qaldıradı.

Kórkem ónerge jańasha kózqaras penen qarawǵa shaqıratuǵın, tań qaldırıwshı shıǵarmalardı kóbirek kóriwdi qáleysiz be?

Sizdi I.V.Savickiy atındaǵı Qaraqalpaqstan mámleketlik kórkem óner muzeyine mirát etemiz! Bul jerde sizdi reńli súwrettiń biytákirar dúnyası, siyrek ushırasatuǵın kollekciya hám shıǵarmaları dúnya júzilik kórkem óner miyrasınıń ajıralmas bólegine aylanǵan xudojniklerdiń turmıslıq kórinisleri kútpekte.

Nókiske keliń hám "Sahradaǵı Luvr" atı menen belgili muzeyde ózińiz ushın jańalıq ashıń!