Itibardan shette qalmaytuǵın natyurmort

"Ózbekstan: sahradaǵı avangard" kórgizbesindegi shıǵarmalar arasında Ilya Mashkovtıń 1910-jıllarda jaratılǵan "Natyurmort" dóretpesi bárqulla miymanlardıń itibarın ózine tartadı.

Ashıq reńli miyweler, ǵarbızdıń úlken bólegi, qızıl, jasıl, sarı hám fiolet reńlerdiń úylesimi - shıǵarmanıń hár bir elementi energiya hám molshılıq sezimin sáwlelendiredi. Mashkov dástúriy natyurmortqa tán tınısh hám barlıqtı illyuzion súwretlew usılınan waz keshedi: buyımlar iri, derlik monumental formalarga aylanadı, reń bolsa óz aldına kórkem ańlatıw quralı sıpatında payda boladı.

Xudojnik ushın miywelerdi anıq hám tábiyiy súwretlewden kóre, reń, forma, faktura hám reńsúwrettiń ózine tán kúshliligi áhmiyetli. Bul tárep Mashkov hám "Bubnoviy valet" xudojnikler toparına tán bolǵan Sezann dóretiwshilik ashılıwlarına hám XX ásir baslarında reńli súwrettiń jańa kórkem tiline bolǵan qızıǵıwshılıqta ayqın kórinedi.

Ózbekstan mámleketlik kórkem óner muzeyi kollekciyasınan orın alǵan bul shıǵarma búgingi kúnde Nókiste "Ózbekstan: sahradaǵı avangard" kórgizbesi sheńberinde kórsetilmekte. Bul kartina óziniń jarqınlıǵı hám tań qalarlıq dárejede zamanagóyligi menen tamashagóylerdi tań qaldırmaqta.