⭕️ ال بیرلیک

✍️ شاعر: #علی_دل‌پاک

بیر سۆرو ال بوْیدا، کیچیک بالێق‌لار
بیر دنیز دیبینده یاشایێـردیلار
دنیز یوْسونلارین اوْتلایێـردیلار
توْپلو یاشاماغێ، خوْشلایێـردیلار

کؤپک بالێق‌لاری، بو بالێق‌لاری
دوتوب یئییردیلر قوْلایجاسێنا
هامێسی قوْرخویلا یاشایێردیلار
چاره آختاردێلار، بولالار بونا

بیرگۆن بیر قورولتای، بیرگه قوردولار
بیر قورتولوش یوْلو، بولسونلار بونا
دئدیلر: چاره‌میز بیرلیک، بیرلشمک
بیرلشمک سوْن قویار، بؤیله سوْرونا

بیر کلک، بیر اوْیون تاسارلادێلار
بیر ساواش دۆزنی، حیله‌سی کیمی
آلداتدێـلار کؤپک بالێق‌لارینی
قوْوسونلار اوْنلارێ، قورتولسون هامێ

توْپلاشدێلار بیرجه بالێق شکلینده
بؤیۆک ایت بالێغی، گؤرۆنوردولر
ایت بالێغی آغزێن آچمێش کیمی ایدی
سانکێ سالدێـرماغا یۆگوروردولر

هر یوْل ایت بالێغی، گؤرنده اوْنلار
یئکه ایت بالێغی کیمی اوْلدولار
سالدێران دورومو، قوْنومو دوتوب
ایت بالێغین قوْووب، ساغلام قالدێلار

بیرلیک کؤلگه‌سینده دینج یاشادێلار
دۆشمنلرینه تئز اۆستون گلدیلر
بیرلیڲی دادێـلار، ال چکمه‌دیلر
یاخشێ دۆشونجه‌نین قدرین بیلدیلر


@MuncuqAz
https://t.me/Sancaq_media/8489