⭕️ بایقوش ایله سئرچه‌نین حکایه‌سی
 
✍️ یازان: #داود_پیرعلیلو (یوْرقون یکانی)
 
ایکینجی بؤلۆم
 
اوْ قوْجا بایقوشون قارشێسینا گلدی و تعظیم ائتدی . لاکین قوْجا بایقوشدان هئچ بیر رئاکسیا* گلمه‌دی! او سادجه سئرچه‌یه باخدێ. سانکی اوْنو یوْخلایێـردی!
 
سئرچه اؤزۆنون اهمیّت‌لرینی گؤسترمک اۆچون اوّلدن دانێشماغا باشلادێ. او مکتبده ائشیتدیڲی ان مرکب و فیلسوْفیک* جمله‌لری آرد – آردا* تکرارلایاراق؛ «بلکه بو سؤزلریم اوْنون خوْشونا گلیب و منیم‌له دانێشماغا باشلایار!» امّا او قدر دانێشدی کی، آخێردا اؤز سسی‌نین یوْرولدوغونو حیسّ ائتدی.
 
او فیکرلشدی یاخشێ‌سی بودور، قالان زنگین سؤزلریمی صاباحکی گؤرۆشه ساخلایێـم. ایندی ایسه حؤرمتیمی بیلدیریب، بوردان اوزاقلاشێم.
 
قوْجا بایقوش بیردن سانکی بو سس - کۆی اوْنو بئزدیرمیشدی دییه، آغێر بیر سس‌له دئدی:
-  آی کیچیک قوش، گل بورا یاخێنلاش! قولاغێـنی یاخێن گتیر، سنه بیر سرّ دئییم!
 
سئرچه سئوینجدن دورا بیلمه‌دی. هیجانلا جواب وئردی:
- بو... بو... بویورون بؤیۆک بڲ!
 
قوْجا بایقوش درین بیر آه چکدی و مۆدروکلوک ایله دوْلو سؤزلرینی سؤیله‌مـڲه باشلایێب، دئدی:
 
- بایقوشا هر گۆن آللاه قاتێندان اۆچ روزی نصیب اوْلار. او، بو اۆچ روزی‌دن یالنێـز بیرینی اله کئچیرر. ایکیسینی‌سه حیاتێـنا قایتارێب، زمانێـنا تاپشێریب، آزاد ائدر. سن ده هله آزاد اوْل! امّا یاددان چێخارما، هئچ بیر مجلیسه اؤزۆنه بوْیاق ووروب، باشقاسێنا بنزه‌یه‌رک گیرمه! توْپلومدا یالنێـز اؤزۆن اوْلمالێسان. اؤز رنگینده!  بیرده کی، اڲر بیر مجلیسه داخیل اوْلورسانسا، چالێش اوْنلاردان یئنی بیر شئی اؤڲره‌نه‌سن.  
بونو دا بیل کی، بورا گلیب مندن درس آلان بایقوش‌لارێن هر بیری مختلف جغرافیالارێن، مختلف علملرین معلّم‌لری‌دیرلر. ایندیسه تئز اوچوب، گئت چۆنکی ایندی اۆچ آیری بایقوش گلیر، نؤبتلری چاتێب.
 
سئرچه‌نین گؤزلری سئوینج و قوْرخو ایله دوْلوب، او قوْجایا اۆرکدن تشکّر ائدیب، قانادلارێـنی آچدێ و ائله سرعت ایله اوچدو، سانکی بئش آچێلان تۆفنڲین لۆله‌سی‌نین آغزێـندان چێخان بیر مَرمی* ایدی.
 
🔶 آچێقلامالار؛
 
رئاکسیا: بوردا عکس‌العمل آنلامێندادی
فیلسوْفیک: فلسفی
آرد – آردا: دالبادال
مَرمی: فشنگ
 
#سون
 
 
@MuncuqAz
https://t.me/Sancaq_media/8483