⭕️ بایقوش ایله سئرچه‌نین حکایه‌سی
 
✍️ یازان: #داود_پیرعلیلو (یوْرقون یکانی)
 
بیرینجی بؤلۆم
 
گؤزل بیر باهار سحری ایدی. گۆنش یئنی دوْغولموشدو و اطرافداکی طبیعت تئزلیکله جانلانێـردی.

گۆنلرین بیرینده، کیچیک بیر سئرچه کی، اؤز عائله‌سینده أن عاغێل‌لی و چوْخ‌بیلن کیمی تانێـنیردی، همیشه‌کی کیمی یئنی کشف‌لر دالێـنجا اوْیان – بویانا اوچوردو. چوْخ قدیم، یارێم‌قالا بیر خرابه‌لیک ائوین یانێـندان کئچنده، خرابه‌لیڲین قاپێسی‌نین اؤنۆنده، تعجّبلو بیر منظره ایله قارشێلاشدی!
گؤردۆ بؤیۆک تۆکلو و بایقوش، سانکی چوْخ اهمیّتلی بیر شخصیت‌ایمیش کیمی، ساکت و مغرور بیر وضعیتده دایانێـبلار.
 
سئرچه درحال یاخێـنلیقداکی قورو بیر آغاجێن بوداغێـنا قوْندو و آللاهێن یاراتدێغیا حیرانلێق ایله باخدێ. اوْنون ذکاسێ درحال ایشه دۆشدو و اؤز – اؤزۆنه پێـچیلداییب، دئدی: «آی آللاه! منیم گؤرمه‌دیڲیم نه قالێب؟ گؤره‌سن نئجه اوْلور کی، بو جۆر مدح اوْلونان بایقوش‌لار گلیر، اوْنا حؤرمتله تعظیم ائدیب، دخیل اوْلورلار؟»
 
سئرچه‌نین طبیعتینده‌کی کشفیّات روحو اوْیاندێ. اوْ قرار آلدێ، بو سرّی آچمالێ‌دیر. تله‌سیک اطرافداکی ایری – یاشێل یارپاقلاردان اؤزۆنه یاراشێـقلی بیر گئییم دۆزلتدی و «من ده گئتمه‌لییم، گؤرۆب بیلمه‌لییم!» - دئییب، اؤزۆنو بایقوشا بنزه‌تمـڲه چالێـشدی.
 
اوْ اؤز – اؤزۆنه دئدی: «اوْ قاپێ‌نین آراسێندا نه بؤیۆک مجلیس وار!»
اوْ عجیب گئییمینی گئیینیب، اؤزۆنو فنا فند* ایله بایقوش‌لارێن توْپلاندێغی یئره چاتدێردی.
قاپێ‌دا دایانان نوبتچی بایقوشا جدّی بیر تعظیم ائتدی (اوْ تعظیم اوْنون حیوانلار عالمینده‌کی تحصیلیندن گلیردی) و خرابه‌لیڲین قارانلێـق ایچه‌ریسینه داخیل اوْلماق ایسته‌دی.

ایچه‌رییه گیررکن قانادلارێـنی گئنیش آچێب، گؤردۆ منظره داها دا حیرت‌آمیزدیر! آرادا تخته بنزَر بیر یئرده چوْخ قوْجا، ذکالێ گؤرۆنن بیر بایقوش اڲلشیب.
 
گلن هر بایقوش مجلیسه داخیل اوْلان کیمی، اوْنون اۆزونه جدّی نظرله باخێر! هئچ بیر سس چێخمادان درین بیر نفس آلێب – وئریر. سانکی اوْرانێن هاواسێندان درین معلومات توْپلانێـر و هئچکیم‌له دانێشمادان ساکتجه چێخیب گئدیردیلر. «منیم شانسێم یاخشێ‌دی.» - دئییب، ایندی من ده گئدیب، بو صحنه‌نی سئیر ائدرکن مۆدروکه* تعظیم ائتمه‌لییم و اؤز هوشومو ذکامێ اوْنا گؤسترمه‌لییم کی، منیم ده دڲریمین اوْلدوغونو بیلسین.
 
🔶 آچێقلاما؛
 
فَند: حیله – کَلک
مۆدروک: عاقل
 
#آردێ_گلن_ساییدا...
 
 
@MuncuqAz
https://t.me/Sancaq_media/8470