⭕️ شیرین ایش
 
✍️ یازان: #حسین_رسول‌زاده – تبریز شهریندن
 
 
سلام اوشاقلار منیم آدێـم حسین دی؛۱۴ یاشێـم وار. یایێـن اوّل آیی گئدیب مدرسه‌دن کارنامه‌می آلدێـم چوْخ شۆکور درسلرین هامێـسیندا یاخجی نمره‌ ایله قبول اوْلموشدوم. ائوه قئییدنده اؤز – اؤزۆمه دئدیم:«اۆچ آی بئکارام یاخجێـسی بودور آرادا یئییب، دۆزده گزمک یئرینه، بیر ایش تاپێـپ ایشلییم. هم باشێـم قارێـشار، هم بئش – اوْن تومان پول قازانێـم.»
آتام دا همیشه دئییر: «اوْغلان اوشاغی گر‌ک درسین کنارێـندا بیر صنعت ده باشارا.»
 
گئجه آتاما دئدیم:
- آتا منه بیر ایش تاپ.
آتام الینی کۆره‌ڲـیمه چێـرپیپ، دئدی:
- ماشاالله! اوْغلوم یئکه‌لیب، کیشی اوْلوب ایش آختاریر. سوْنرا دئدی: بیزیم توکاندا (آتامین ایشله‌دیڲـی توکان) شاگرد لازیمدی. من دانێـشارام گل اوْردا ایشله.
 
آتامێـن شیرین بیر ایشی وار. گؤیلۆز ایسته‌مه‌سین آتام قنادی‌چی‌دی. بتر، یئمه‌لی شیرنی‌لر پیشیرر. خلاصه من اۆچ آی آتامێـن کنارێـندا ایشله‌دیم. هم پول قازاندێـم، هم ایش اؤرگشدیم. بیر سؤز ده دئییم اؤز آرامێـزدا قالسێـن، آدام اؤزۆ زحمت چکیب، پول قازاناندا هله – هله اۆره‌ڲـیندن گلمیر خرجلییه. بیلمیرم بو آتا – آنالار نجۆر بیر عؤمۆر ایشلییب، عائله‌لرینه خرج‌لییرلر.
 
*****
 
🟣 بالاجا کیشی، حسین آقا! سنی جان و کؤنۆلدن سلاملاییب، یوْرولماسێن دئییرم. دوْغرودان سیزین کیمی اوشاقلار بیزیم غرور و سئوینج قایناغێمیزدیرلار. نه گؤزل قلمین، نه گؤزل دۆشونجه‌ن، نه گؤزل یئرلی – یاتاقلی داورانێشین وار. آفرین سنه.
 
سنین بو کیچیک یازێندا بیر نئچه نکته دقتیمی چکدی، بیری سنین بو قدر عزم‌لی، اراده‌لی و درین دۆشونجه‌لی اوْلماغێن ایدی. ایکینجی‌سی درسلرینده بو قدر باشارێلی اوْلدوغون حالدا، ایندی‌دن بئله گؤزل اقتصادی فکرلرین اوْلماق ایدی. باشقا گؤزل نکته ایشلتدیڲین ادبیات، جۆمله قورولوشو و یارارلاندێغین آتا سؤزلری ایدی.
 
بونلاردان اؤته سنده اوْلان بو اؤزل‌لیکلر سنین اردملی بیر عائله‌ده بوْیا – باشا چاتماغێنی بیلیندیرمک ایدی. کسین سن چوْخ بیلگین انسانلاردان تربیه آلمێسان. داها دوْغروسو من ده آتانلا راضی‌لاشێرام. اوشاق (اوْغلان- قێز اوْلماسی هئچ ده اؤنملی دڲیل) درس و تحصیل ایله یاناشی بیر ایشلر ده باشارمالێدی. سؤزۆ اوزاتمادان بونو دئییم کی، سنی تانێـدیقدان سوْنرا چوْخ سئویندیم و اۆز اۆره‌ڲیمده دئدیم کئشگه سیزین بو شیرینی توکانێـنی تانێـییب، گلیب سنی یاخێـندان گؤرۆب، سنین الیوین بو شیرین امه‌ڲینی بیر دادایدێم. سنه و سنین کیمی درین دۆشونن یاشێدلارینا، باشارێلار آرزولایان، #گۆنش_امانی.
 
 
@MuncuqAz
https://t.me/Sancaq_media/8464