بیز آذربایجان طرفی دئییل، آذربایجانین اؤزویوک.
بیلمیرم ادبیات‌ین آللاهی کیمدی، آما ادبیات‌ین پیغمبری منیم گؤزومده داستایوفسکی‌دی و میرزه جلیل ممدقولوزاده‌دن، چینگیز آیتماتوف‌دان، اورهان پاموک‌ا قدر، چوخلاری اوندان الهام آلیب. او اؤزو ده بالزاک‌دان و بالزاک ناپلئون بناپارت‌دان الهام آلیب. بس ناپلئون جنابلاری بو الهامی هاردان آلیبدیر؟
تاریخچی‌لر نادرشاهی، تورکلرین و شرقین ناپلئونو آدلاندیریر و ناپلئون مکتوبلاریندا نادرشاهی چوخ وصف ائدیر و اونا سایغی گؤستریر و بلکه بو الهام زنجیره‌سی‌نین ایلک قایناغی نادرشاه ایمیش!! تاریخچی‌لر هم ده نادرشاه‌ا «سونونجو فاتح» لقبی وئریر. آما اصلینده سونونجو فاتح، قاراباغی فتح ائدن عسکرلر و اونلارین باشیندا دوران عالی‌مقام‌دیر و او مقام، نادرشاه‌دان بوگونه قدر، همه‌شه اوتوزماقدا اولان تاریخی‌میزین یگانه مظفری‌دی.
الهام علی‌یئوین کئچن گونلرده دیله گتیردیگی سؤزلری روسیه، تورکییه و ایران آخماقلارینا اود ووروب یاندیردی و جناب حولوسی کیلیچ (تورکییه‌نین آذربایجانداکی کئچمیش سفیری) او اخماقلارا بئله جاواب وئردی: «آذربایجان مستقل و سووئرئن دؤولتدیر. آذربایجانین داخلی ایشلرینه و خارجی سیاستینه قاریشماق هئچ کیمین حاققی دئییل و حددینه ده دئییل. بیه‌نرسینیز، بینمزسینیز، سسی‌نیزی کسیب اوتورون. بیز بیر عاییله‌یک. آذربایجانا ائدیلن هجوم، عاییله‌یه هجومدور.»
کئچمیش سفیر آذربایجانین تورکییه‌یه یاتیریملارینی، طبیعی فلاکتلر و آلتی فئورال زلزله‌سی زامانی گؤستردیگی یاردیملارینی خاطیرلادیب، فلسطین مسئله‌سی حاقدا بئله دئییب: «آذربایجان فلسطین دؤولتی‌نی هله ۱۹۹۲جی ایلده رسمیته تانییب، غزه‌یه انسانی یاردیملار گؤندریب، سازمان ملل‌ده فلسطین نفع‌ینه سس وئریب. هر کس آغلینی باشینا توپلاسین و مسئولیتی‌نی بیلسین. هئچ کیم بیزی سئومه‌ینلرین دیرمانینا سو تؤکمه‌سین.»
آما جناب سفیر بعضی معذوریت‌لره گؤره لاپ مهم مسئله‌نی دیله گتیرمه‌ییب و او مسئله بوندان عبارت‌دیر کی نتانیاهو سازمان ملل‌ده دانیشاندا، آذربایجان نماینده‌سی مجلسی ترک ائتمه‌دی. بونا اعتراض ائدنلر بیلمه‌لیدیلر کی قاراباغدا اوشاق و قادین قانینی ایچن سرژ سرکیسیان، اون ایل و اون دفعه سازمان ملل‌ده دانیشدی و ایندی انسانلیق آدینا باغیران اؤلکه‌لرین نماینده‌لری، ساکیت‌جه اوتوروب او وحشی‌نی دینله‌دیلر و ایندیکی «چوخ یئمک» اونلارا هئچ ده یاراشمیر.
-----------
@ibrahimsavalan
Post #34678
835
Forwarded from ibrahim savalan
- ❤ 68
- 👍 14
- 🤣 6
- ❤🔥 3
- 💯 2