تورکو بیر چشمه ایسه، من اونو دریا ائله‌دیم،
بیر سویوق معرکه‌نی، محشر کبرا ائله‌دیم.
بیر ایشیلتی‌یدی، سوها اولدوزو تک گورسنمز،
گوز یاشیملا من اونو عِقد ثریّا ائله‌دیم.
اومیدیم وار کی بو دریا هله اوقیانوس اولا،
اونا ضامن بو زمینه، کی مهیّا ائله‌دیم.
عرفانا چاتماسا شعر و ادب، ابقا اولماز،
من ده عرفانه چاتیب شعریمی ابقا ائله‌دیم.
ابدیّتله یاناشدیم، دوغولا حافظه تای،
شیرازین شاهچراغین تبریزه اهدا ائله‌دیم.
تورکونون جانینی آلمیشدی حیاسیز طاغوت،
من حیات آلدیم اونا، حقّ اوچون احیا ائله‌دیم.
فیض روح القدس اولدو مددیم حافظ تک،
من ده حافظ کیمی اعجاز مسیحا ائله‌دیم.
قمه-قدّاره‌لر آغزیندا دیل اولموشدو سؤیوش
من سئوینج ائتدیم اونو، خنجری خورما ائله‌دیم.
ایندی گؤیلرده گؤزل صفله، صفا ایله گزیر،
منجلابلاردا اوزن اؤردگی، دورنا ائله‌دیم.
باخ کی حیدر بابا افسانه تک اولموش بیر قاف،
من کیچیک بیر داغی، سر منزل عنقا ائله‌دیم.
بوردا روشن ضمیرین ده هونرین یاد ائده‌لیم،
من اونون دا قلمین، طوطی گویا ائله‌دیم.
نه تک ایراندا منیم ولوله سالمیش قلمیم،
باخ که تورکیّه‌ده، قافقازدا نه غوغا ائله‌دیم!
باخ کی تهراندا نه فرزانه‌لر اولموش والئه،
باخ کی تبریزده نه شاعیرلری شیدا ائله‌دیم.
هم سهندیّه سهندین داغین ائتدی باش اوجا،
هم من اؤز قارداشیمین حقّینی ایفا ائله‌دیم.
آجی دیل‌لرده شیرین تورکو اولوردو حنظل،
من شیرین دیللره قاتدیم اونو، حلوا ائله‌دیم.
هر نه قالمیشدی کئچن‌لردن اونا بال پتگی،
اریدیب موملو بالین شهد مصفّا ائله‌دیم.
تورکو، واللاه، آنالار اوخشاغی، لایلای دیلی‌دیر،
دردیمی من بو دوا ایله موداوا ائله‌دیم.
شهریار، حیف سویوق‌دور بو دَییرمان هله ده،
دارتماغا یوخدو دنی، من ده مودارا ائله‌دیم.
شهریار
Post #81
28
- ❤ 2