Ինձ մոտ այնպիսի տպավորություն է, որ մեր խորհրդարանը կատարելության է հասցրել սեփական խղճի առաջ արդարանալու արվեստը։ Արդեն մի քանի ամիս է՝ մենք շարունակաբար բանաձևեր ենք ընդունում՝ իրավացիորեն դատապարտելով Ադրբեջանի քաղաքական իրավիճակը, սակայն մեր խոսքերին գործնական քայլեր չեն հաջորդում։
Մինչդեռ տեղում տիրող իրական իրավիճակն անհապաղ միջամտություն է պահանջում։
Բռնաճնշումների առաջին զոհերն են քաղաքացիական հասարակության ներկայացուցիչները, լրագրողները և քաղաքական ընդդիմախոսները, որոնց Ալիևի ավտորիտար ռեժիմը հետևողականորեն լռեցնում է։ Հետապնդումների են ենթարկվում նաև Լեռնային Ղարաբաղի հայ նախկին ղեկավարները, որոնք մինչ օրս ապօրինաբար պահվում են ադրբեջանական բանտերում՝ կեղծ դատավարությունների արդյունքում։
Իսկ ի՞նչ է անում Եվրամիությունը գործնականում։ Մի կողմից՝ նոր գործընկերության համաձայնագիր է կնքում Բաքվի հետ, մյուս կողմից՝ Եվրամիության մեր ներկայացուցիչներին տանում է շրջայցի դեպի 2023 թվականի էթնիկ զտումների հետևանքով հայաթափված Լեռնային Ղարաբաղ։ Ի՜նչ ցինիզմ։
Ակնհայտ է, որ մենք պետք է պահանջենք անհապաղ և առանց որևէ նախապայմանի ազատ արձակել բոլոր ադրբեջանցի քաղբանտարկյալներին, ինչպես նաև անհապաղ և առանց որևէ նախապայմանի ազատ արձակել բոլոր հայ գերիներին, որոնք ապօրինաբար պահվում են անազատության մեջ։
Սակայն միայն բանաձևեր ընդունելն այլևս բավարար չէ։ Ժամանակն է, որ Ադրբեջանի հետ մեր հարաբերությունները պայմանավորենք մարդու իրավունքների և հիմնարար ազատությունների խստիվ պահպանմամբ։
Հակառակ դեպքում Եվրամիությունը վերջնականապես կկորցնի իր վստահելիության վերջին մնացորդները։
Եվրոպական խորհրդարանում Ադրբեջանի վերաբերյալ քննարկումների ընթացքում ֆրանսիացի պատգամավոր, «Ձախակողմյաններ» խմբակցության ներկայացուցիչ Մարինա Մեզյուրի ելույթը
Post #1245
150
- 👍 5
- ❤ 1
- 🙏 1