ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်​၏ ၇-၁၀-၂၀၂၆ ရက်နေ့မှ ၈-၁၀-၂၀၂၆ ရက်နေ့ထိ မလေးရှားနိုင်ငံသို့ တရားဝင်ခရီးစဉ်အနှစ်ချုပ်၊ အပိုင်း(၃)
 
■ နှစ်နိုင်ငံခေါင်းဆောင်များ တွေ့ဆုံဆွေးနွေးခြင်း
 
၂၀၂၆ ခုနှစ်၊ အောက်တိုဘာလ ၈ ရက် ၁၀၀၀ နာရီမှ ၁၀၄၅ နာရီထိ ဝန်ကြီးချုပ်ရုံး၌ ကျင်းပပြုလုပ်သည့် မြန်မာ-မလေးရှား နှစ်နိုင်ငံဆွေးနွေးပွဲ (Extended format) တက်ရောက်၍ နှစ်နိုင်ငံဆက်ဆံရေးနှင့် ကဏ္ဍစုံပူးပေါင်းဆောင်ရွက်မှုများ တိုးမြှင့်ရေးဆိုင်ရာ ကိစ္စရပ်များ ဆွေးနွေးခဲ့ကြပါသည်-
 
■ နှစ်နိုင်ငံဆက်ဆံရေးနှင့် သံတမန်ရေးရာ ပူးပေါင်းဆောင်ရွက်မှု။ ရှိရင်းစွဲချစ်ကြည် ရင်းနှီးမှုနှင့် သံတမန်ဆက်ဆံရေး ပိုမိုခိုင်မာစေရေး၊ ၂၀၂၈ ခုနှစ်တွင် ကျရောက်မည့် မြန်မာ–မလေးရှား သံတမန်ဆက်ဆံရေး နှစ် ၇၀ ပြည့် အထိမ်းအမှတ်အစီအစဉ်များ ဆောင်ရွက်ရေးနှင့် နှစ်နိုင်ငံအစိုးရအချင်းချင်း ထိတွေ့ဆက်ဆံမှုများ တိုးမြှင့်ရေး ဆွေးနွေးခဲ့ကြပါသည်။
 
■ စီးပွားရေးနှင့် ရင်းနှီးမြှုပ်နှံမှု။ နှစ်နိုင်ငံကုန်သွယ်မှုနှင့် ရင်းနှီးမြှုပ်နှံမှု တိုးမြှင့်ရေး၊ စိုက်ပျိုးရေး၊ မွေးမြူရေး၊ ရေထွက်ကုန်၊ စွမ်းအင်နှင့် နည်းပညာကဏ္ဍများတွင် ပူးပေါင်းဆောင်ရွက်မှု တိုးချဲ့ရေး၊ Business Forum၊ MSME နှင့် Digital Trade လုပ်ငန်းများမှတစ်ဆင့် နှစ်နိုင်ငံ စီးပွားရေးလုပ်ငန်းရှင်များအကြား ချိတ်ဆက် ဆောင်ရွက်မှု မြှင့်တင်ရေး ဆွေးနွေးခဲ့ကြပါသည်။
 
■ ပညာရေး၊ ကျန်းမာရေးနှင့် ခရီးသွားလုပ်ငန်းကဏ္ဍ။ ပညာသင်ဆုအစီအစဉ်များ၊ ကျောင်းသားနှင့် ဆရာများ အပြန်အလှန်ဖလှယ်ရေး၊ သုတေသနနှင့် လူ့စွမ်းအား အရင်းအမြစ် ဖွံ့ဖြိုးတိုးတက်ရေး၊ ဆေးဘက်ဆိုင်ရာနည်းပညာနှင့် ကျန်းမာရေး ဝန်ဆောင်မှုလုပ်ငန်းများတွင် ပူးပေါင်းဆောင်ရွက်ရေးအပြင် ခရီးသွားလာရေးနှင့် ပြည်သူအချင်းချင်း ထိတွေ့ဆက်ဆံမှုများ တိုးမြှင့်ရေး ဆွေးနွေးခဲ့ကြပါသည်။
 
■ အလုပ်သမားရေးရာ။ မလေးရှားနိုင်ငံရောက် မြန်မာအလုပ်သမားများ၏ အခွင့် အရေး၊ လုပ်ငန်းခွင်လုံခြုံရေးနှင့် လူမှုဖူလုံရေး ကာကွယ်စောင့်ရှောက်ရေး၊ တရားဝင် လမ်းကြောင်းမှ စနစ်တကျ သွားရောက်အလုပ်လုပ်ကိုင်နိုင်ရေး၊ ဗီဇာနှင့် အလုပ် လုပ်ကိုင်ခွင့်ပါမစ်ဆိုင်ရာ ကိစ္စရပ်များ အဆင်ပြေချောမွေ့စေရေးတို့ကိုလည်း အလေးထားဆွေးနွေးခဲ့ကြပါသည်။
 
■ မြန်မာနိုင်ငံသားများ နေရပ်ပြန်လည်ခေါ်ဆောင်ရေး။ မလေးရှားနိုင်ငံရောက် မြန်မာနိုင်ငံသား များအား လေကြောင်းနှင့် ရေကြောင်းမှတစ်ဆင့် နေရပ်ပြန်လည် ခေါ်ဆောင်ပေးခဲ့မှုများအတွက် ကျေးဇူးတင်ရှိကြောင်းနှင့် ပြန်လည်ခေါ်ဆောင်ရန် ကျန်ရှိနေသူများကို နိုင်ငံသားဖြစ်မှု စိစစ်အတည်ပြုပြီး သင့်လျော်သည့်နည်းလမ်းများဖြင့် ဆက်လက်ခေါ်ဆောင်ရေး၊ မလေးရှား နိုင်ငံအပေါ် ဝန်ထုပ်ဝန်ပိုးမဖြစ် စေရန် ပူးပေါင်းဆောင်ရွက်ရေးတို့ကို ဆွေးနွေးခဲ့ကြပါသည်။
 
■ နိုင်ငံဖြတ်ကျော်မှုခင်းများ တိုက်ဖျက်ရေး။ အွန်လိုင်းလိမ်လည်မှု၊ လူကုန်ကူးမှု၊ မူးယစ်ဆေးဝါးမှုခင်းများနှင့် နိုင်ငံဖြတ်ကျော်ရာဇဝတ်မှုများ တားဆီးနှိမ်နင်းရေး၊ နှစ်နိုင်ငံနှင့် ဒေသတွင်း တရားဥပဒေစိုးမိုးရေးအဖွဲ့များအကြား သတင်းအချက် အလက်ဖလှယ်ရေးနှင့် တရားမဝင်လုပ်ငန်းများတွင် ပါဝင်ပတ်သက်နေသည့် နိုင်ငံခြားသားများအား စိစစ်ဖော်ထုတ်၍ သက်ဆိုင်ရာနိုင်ငံများသို့ ပြန်လည် လွှဲပြောင်းရေးတို့ကို ဆွေးနွေးခဲ့ကြပါသည်။
 
■ အာဆီယံနှင့် မြန်မာနိုင်ငံ၏ နိုင်ငံရေးဖြစ်စဉ်ဆိုင်ရာကိစ္စရပ်များ။ အာဆီယံ ပဋိညာဉ်၊ အာဆီယံဘုံသဘောတူညီချက်ငါးရပ် (Five-Point Consensus)၊ မြန်မာ နိုင်ငံ၏ နိုင်ငံရေးဖြစ်စဉ်နှင့် ရွေးကောက်ပွဲဆိုင်ရာကိစ္စရပ်များ၊ ရွေးကောက်ပွဲ လေ့လာစောင့်ကြည့်ရေးနှင့် အာဆီယံမူဘောင်အတွင်း ပူးပေါင်းဆောင်ရွက်မှုများ ဆက်လက်မြှင့်တင်ရေးတို့ကို အမြင်ချင်းဖလှယ်ဆွေးနွေးခဲ့ကြပါသည်။
 
■ သဘာဝဘေးအန္တရာယ်နှင့် လူသားချင်းစာနာမှုဆိုင်ရာ ပူးပေါင်းဆောင်ရွက်ရေး။ ၂၀၂၅ ခုနှစ် မန္တလေးငလျင်အတွင်း မလေးရှားနိုင်ငံမှ ရှာဖွေကယ်ဆယ်ရေးနှင့် ဆေးဘက်ဆိုင်ရာအကူအညီများ ပေးအပ်ခဲ့မှုအခြေအနေ၊ အရေးပေါ်ဆေးကုသရေး နှင့် လူသားချင်းစာနာမှုဆိုင်ရာလုပ်ငန်းများ၌ ပူးပေါင်းဆောင်ရွက်ရေးတို့ကို ဆွေးနွေး ခဲ့ကြပါသည်။ ထို့ပြင် ရခိုင်ပြည်နယ်ဆိုင်ရာကိစ္စရပ်များ၊ နေရပ်စွန့်ခွာသူများအရေး နှင့် နိုင်ငံသားဖြစ်မှု စိစစ်အတည်ပြုပြီးသူများအား ပြန်လည် လက်ခံရေးတို့ကိုလည်း ဆွေးနွေးခဲ့ကြပါသည်။
 
■ နှစ်နိုင်ငံပူးပေါင်းဆောင်ရွက်မှုများ လက်တွေ့အကောင်အထည်ဖော်ရေး။ သံတမန် ရေးရာ၊ စီးပွားရေး၊ ပညာရေး၊ ကျန်းမာရေး၊ နည်းပညာနှင့် လုံခြုံရေးကဏ္ဍများတွင် ပူးပေါင်းဆောင်ရွက်မှုများ ဆက်လက်တိုးမြှင့်ရေး၊ သက်ဆိုင်ရာဝန်ကြီးဌာနများအကြား ညှိနှိုင်းဆောင်ရွက်ရေးတို့ကို ဆွေးနွေးခဲ့ကြပြီး နိုင်ငံတော်သမ္မတက မလေးရှားနိုင်ငံဝန်ကြီးချုပ်နှင့် မလေးရှားဘုရင်မင်းမြတ်တို့ အား မြန်မာနိုင်ငံသို့ လာရောက်လည်ပတ်ရန် ဖိတ်ကြားခဲ့ပါသည်။