Қирғизистонда «Арашан» зотли қўчқор 1 млн долларга сотилди

Қирғизистонда «Арашан» зотини ривожлантиришга бағишланган фестивалда миллион долларлик савдо амалга оширилди. Республика Қишлоқ хўжалиги вазирлиги маълумотига кўра, қўчқор $1 млнга сотилган.

Тадбирда Қирғизистон, Россия, Қозоғистон, Ўзбекистон ва Тожикистондан фермерлар иштирок этди.

Маълум қилинишича, қимматбаҳо наслдор қўчқор 2023 йилда Қозоғистонга $150 мингга сотилган машҳур Франкель қўчқорининг ўғли ҳисобланади. Франкель «Арашан» зотининг машҳур вакилларидан бири бўлиб, Талас яйловларида парваришланган.

«Арашан» зоти 2021 йилда Қирғизистонда расман рўйхатдан ўтказилган. У ҳисори ва қирғиз дағал жунли қўй зотларини чатиштириш орқали яратилган.

Аввалроқ ушбу зотга Қозоғистон ва Ўзбекистон фермерлари ҳам қизиқиш билдиргани хабар қилинган.

👉 @Kun_Uz