Бӧрйысьӧмъяс гугӧдысьяс-гусялысьяс дінӧ шыӧдчӧм.

(Абу) пыдди пуктана бӧрйысян комиссияясын уджалысьяс, администрацияясысь чина йӧз да мукӧд налы отсалысь "уджалысьяс"! Ті тӧданныд, мый ті ӧні вӧчинныд. Ті гугӧдінныд йӧзыслысь бӧрйысьӧмъяс вылас шуӧмсӧ. Бергӧдінныд кывкӧртӧдсӧ, мырдӧналінныд йӧзыслысь аскиалунӧ эскӧмсӧ. И ті тӧданныд, мый татшӧмыс Комиын некор на эз вӧвлы.

Весиг оз тӧждӧд, мый могысь ті сюйсинныд тайӧ вӧчӧмас. Окотапырысь ли зывӧклунйӧн. Сьӧм лэптан могысь ли дон босьттӧг, идея вӧсна. Оз тӧждӧд сы понда, мый унджык помкаыс тіян воклӧн(чойлӧн) - пемӧслӧн кодь джӧмдӧдысь полӧм. Полӧм пуксьыны (ті сідз и тадз пуксянныд). Полӧм челядь вердан удж воштыны (мыйӧн торъялӧны тіян челядь мукӧд челядь дінысь, кодлӧн бать-мамыс воштісны нин удж?). Полӧм кольны нажӧвитӧм эмбуртӧг да олан  уровеньтӧг (сійӧ каднас, кор тіян сиктсаясыд, Комиын олысьяслӧн важӧн нин воштісны, тіян отсӧгӧн). Полӧм юр вуэалысьяс костӧ веськавны (ті на костын нин важӧн). Война локтан полӧм (война быть локтас сы панысьяс дінӧ).

Вӧчӧмыс лоис вӧчӧма тіян киясӧн, и ті пуктінныд асланныд кырымпас та улын. (збыльысь коліс эськӧ таысь повны - кырымпасыд коляс пыр кежлӧ)

Унаӧн ті пӧвстысь  тӧдысь, вежӧра йӧз. Ті аддзанныд, мый воысь воӧ олӧмыс Комиын лоӧ сьӧкыдджыкӧн. Аддзанныд-ӧ ті кӧть кутшӧмкӧ бур аскиалун асланыд  сиктлы, карлы, республикалы? Эм-ӧ тіян мӧвпъясад, чайтӧмъясад кӧть кутшӧмкӧ туй, кодӧн мунігӧн Комиын олӧмыс ладмас, лоас шудаӧн, озырӧн, лӧньӧн, кокньыдджыкӧн да лӧсьыдджыкӧн быдӧнлӧн (не сӧмын тіян да тіян рӧдвужыдлӧн)? Коми збыльысь мунӧ татшӧм туйӧд?

Вежӧрнад ӧд гӧгӧрвоанныд, мый оз. Уджыдлӧн тӧлкыс да помыс вошӧма нин быд лунъя ноксьӧмын.
Эз на дӧнзьӧд пӧрйӧдлыны асьнытӧ?
Татшӧмтор вӧчӧм бӧрын ті водзӧ на понданныд чайтны, мый Комилы да асланыд йӧзлы бур вылӧ уджаланныд? Тіян киясӧн Москва вӧчӧ дзик мӧдарӧ ваянтор, и ті гӧгӧрвоанныд тайӧс. И ставыс, мыйысь поланныд, быть локтас, локтас ӧтпӧрйӧ.

Тіянӧс пыр повзьӧдлӧны вӧрӧгъясӧн да юр вузалысьясӧн, кодъяс зільӧны лёк вӧчны, канмунымӧс жугӧдны, торкны олӧмсӧ йӧзыслысь.

А збыльысь некутшӧм вӧрӧгъяс оз и ковны. Тіян и натӧг лӧсьыда ставыс артмӧ. Мый тӧлкыс канмулӧн, коді ӧдва кутчысьӧ кок вылас сӧмын татшӧм ногӧн да татшӧм донӧн? Тайӧ збыльысь зумыд канму?

Думыштӧй.
Колис кӧ неуна сьӧлӧм дой асланыд му да сылӧн йӧз дінӧ.