✅ “Бір дерек” айдары

Тұран жолбарысы – кезінде Қазақстан мен Орта Азияның кең байтақ даласын мекендеген айбарлы жыртқыш. Оны Каспий жолбарысы деп те атайды. Бұл аң Іле, Сырдария, Әмудария өзендерінің бойындағы тоғайлы ормандар мен қамысты қопаларды паналаған.

Тұран жолбарысы денесінің ірілігімен, күш-қуатымен және ерекше сұлулығымен танылған. Ол негізінен қабан, бұғы және басқа да жабайы жануарлармен қоректенген. Алайда адамның табиғатқа ықпалы, мекен ету ортасының жойылуы мен шектен тыс аулау салдарынан бұл жыртқыштың саны күрт азайған. ХХ ғасырдың ортасына қарай Тұран жолбарысы табиғатта жойылып кетті деп есептеледі.

Бүгінде Тұран жолбарысының тағдыры – табиғатты қорғаудың маңызын еске салатын тарихи сабақ. Қазақстанда жолбарысты тарихи мекеніне қайта жерсіндіру бағытында жұмыстар жүргізіліп келеді. Бұл бастамалар өзен бойындағы тоғайларды қалпына келтіруге, биоалуантүрлілікті сақтауға және экожүйені қорғауға бағытталған.

Толығырақ күн сайын “Бір дерек” айдарынан 9:20, 11:20, 16:30, 17:40, 19:58-де Қазақ радиосының эфирінен тыңдай аласыздар.

✅ ҚазМұнайГаз-Аэро