Ул 1868 елның 28 сентябрендә Казан өязе Ташсу авылында, мулла гаиләсендә дөньяга килгән. Татар морзалары Сөендековлар нәселеннән, Садри Максудиның абыйсы.

Казанда яшәп, «Касыймия» мәдрәсәсен тәмамлаганнан соң укыта башлый, беренчеләрдән булып яңа ысул куллана. Төркия һәм Кырымда белем бирү тәҗрибәсен өйрәнә, И.Гаспринский чакыруы белән «Зынҗырлы» мәдрәсәсендә укыта.

1906 елда «Йолдыз» газетасын ачып, татар матбугаты тарихына зур өлеш кертә. Казан шәһәр думасы гласные буларак, беренче татар китапханәсен – «Көтебханәи исламия»не ачтыра.

«Мөгаллим әүвәл» әлифбасы 30дан артык басма кичерә һәм казакъ, үзбәк, кыргыз, башкорт балаларына да татарча укырга-язарга өйрәтә.