«قوزغونلارین اوچدوغو گؤیدن، دارا چکیلمیش بیر اومودون آغیسی»
شهریور آیی‌نین ١٢سی‌نین آنیسینا

آذربایجان ملی حکومتی و آدی- خاطیره سی یاشار لیدریمیز میر جعفر پیشه وری حقده یازیلمیش «قوزغونلارین اوچدوغو گؤیدن، دارا چکیلمیش بیر اومودون آغیسی - شهریور آیی‌نین ١٢سی‌نین آنیسینا» آدلی یازینی، «دوراق» تلگرام‌ کانال یندان آلمیشام.
«حامید مرسلی» جنابلارینین آردیجیل زحمتی و چاباسی سایه سینده یارانان «دوراق» آدلی تلگرام‌ کانالی، دیلیمیز و ملی غایه میز اوچون بیر غنیمت و بیر قارانج ساییلیر.
حامید جنابلاری کانال حقده یازیر:
[«دوراق» ایلک باشدا «کیتاب تانیتیمی» اوچون آچیلمیشدی. سونرا هر هانسی قونودا یازدیقلاریمی و بعضن دوستلارین یازیلارینی بوردا پایلاشماق قرارینا گلدیم. کانالین آدینی دوراق سئچدیم.]

کانال ایله تانیش اولدوقدان سونرا، منده بعضا بو «دوراق» دا دایانیب و فضاسیندا نفس آلیب و بعضی یازیلارینی لذت و آغیز دادی ایله اوخویورام.
تلگرام‌ دا البته ملی- دموکراتیک‌ مبارزه میز ایله علاقه دار بیر نئچه فایدالی کانال لار واردی، فقط «دوراق» ین‌ ان‌ گؤزل خصیصه سی یازیلارین آنا دیلیمیزده گئتمه سیدی کی، حامید مرسلی یورولمادان و امیدینی ایتیرمه ده ن بو یول دا آددیملاماقدادی.
کانالین آدرسی:
https://t.me/kitabtanitimi/2466
(اورادان- بورادان)

«قوزغونلارین اوچدوغو گؤیدن، دارا چکیلمیش بیر اومودون آغیسی»-شهریور آیی‌نین ١٢سی‌نین آنیسینا
✍🏻 دوراق
@kitabtanitimi

تاریخین توزلو صحیفه‌لریندن، یالنیز بیر ایل گونش کیمی پارلایان، آنجاق مین ایللیک بیر حسرتی اوره‌کلره اَکن بیر حیکایه سیزلاییر. بو، قارانلیق دوستاقلارین سویوق دیوارلارینی سسی ایله تیتره‌دن، قلمی ایله ظولمت گئجه‌لرینه ایشیق ساچان، و نهایت بیر خالقین اونودولموش آرزولارینی ۱۲ شهریور گونونده بایراق ائدن بیر لیدئرین، میرجعفر پیشه‌وری‌نین حیکایه‌سی‌دیر.
او گلمه‌دن اؤنجه، سؤزلر دوستاق، دیل‌لر لال ایدی. ایل‌لر بویو حبسخانالارین نملی دیوارلاری آراسیندا، آزادلیغین نفسینی دویماغا چالیشمیش‌دی. "آژیر" سسی ایله اویاتدی غفلت یوخوسونا دالانلاری. ژورنالیست کیمی یازدی، مبارز کیمی دایاندی و بیر میللت‌ین سؤنموش اوجاغینی یئنی‌دن آلوولاندیرماق اوچون، اؤزونو بو یولدا شمعین اودونا یانان پروانه سایاغی فدا ائتدی.
و نهایت او گون گلدی. ۱۲ شهریورده، آذربایجاندا یئنی بیر اومود جوجردی. "فیرقه" یالنیز بیر حزب دئییلدی؛ ایل‌لرجه بوغولان بیر سسین هایغیرتیسی، اَزیلن بیر کیملیگین آیاغا قالخماسی ایدی. پیشه‌وری ائله‌جه اونون یولداشلاری بیر ایل ایچینده، بیر عؤموره سیغماز ایش‌لر گؤردولر. یوزلر و بلکه مین‌لر ایل سونرا، آذربایجانین مدرسه‌لرینده آنا دیلیمیزین شیرین نغمه‌سی اوخوندو. تبریز بیلیم یوردونون تمل داشی، جهالتین باغرینا آتیلان بیر گولله کیمی قویولدو. قادینلارا ایلک دفعه سس وئریلدی، تورپاقسیز کندلی امک وئردیگی تورپاغینا قوووشدو. او بیر ایل، تاریخین بیزه باغیشلادیغی ان گؤزل رؤیاسی ایدی. بیر ایل ایچینده، بیر خالقا نئچه یوز ایللیک بیر خیدمتین شرفینی یاشاتدی.

آنجاق بو رؤیا چوخ سورمه‌دی. دونیانین بؤیوک گوجلری‌نین سیاست شطرنجینده، آذربایجانین طالئعی بیر پیادا (شطرنجده اولان سرباز) کیمی قوربان وئریلدی. ایناندیغی داغلارا قار یاغدی، آرخالاندیغی دوستلاری خیانت ائتدی. وعده‌لر اونودولدو، آندلار پوزولدو و میللی حؤکومت یالنیز بوراخیلدی.
او قارا گون‌لر گلنده، تبریزین کوچه‌لرینده کیتابلار یاندیریلدی. هر آلوو، دیلیمیزین، مدنیتیمیزین و تاریخیمیزین قلبینه سانجیلان بیر خنجر ایدی. اومودون سون قارانقوشلاری اولان سردارلار، تبریزین میدانلاریندا دار آغاجلاریندان بیر داها یئره ائنمه‌ین بایراق سایاغی آسیلدیلار. گؤوده‌لر جانسیز یئره سَریلرکن، بیر خالقین آزادلیق آرزولاری دا او دار آغاجلاریندا بوغولدو. اینانمیش فدایی‌لر، یوردلاریندان دیدرگین دوشدولر؛ هر بیری بیر یانا سپه‌لندی، آنجاق اوره‌کلرینده‌کی آذربایجان سئوگیسی‌نی و پیشه‌وری آندینی هئچ بیر زامان اونوتمادیلار.

و نهایت بو خیانت‌لرین، بو آجی‌لارین آردیندان، ساختا بیر ماشین قضاسیندا بو بؤیوک لیدئرین حیاتینا سون قویولدو. سنی اؤلدورن او قضایا "تصادف" دئدی‌لر. آنجاق بیز بیلیریک: سنی اؤلدورن، بیر خالقین اومودونو یئنی‌دن دیرچلتمه‌یه جسارت ائتمه‌ن ایدی. سنی اؤلدورن، خیانتین سویوق اَل‌لری و تاریخین عدالتسیزلیگی ایدی.
بو گون، سنین آدین و خاطیره‌ن، یاندیریلان کیتابلارین کول‌لریندن یئنی‌دن دوغولور. دارا چکیلمیش سردارلارین روحو، گؤیلرده بایراق کیمی دالغالانیر. و سنین بیر ایللیک حؤکومتین، گله‌جک نسیل‌لره بیر یول خریطه‌سی، بیر شرف و بیر اومود میراثی اولاراق قالیر. روحون شاد، یولون داواملی اولسون.