Jizzax viloyati hokimi

JIZZAX VA "BYD GROUP” O‘RTASIDA ISHLAB CHIQARISH QUVVATLARI KENGAYTIRILIB, YANGI INVESTITSIYA LOYIHALAR AMALGA OSHIRILADI

Jizzax viloyati hokimi boshchiligidagi delegatsiyaning Xitoyga tashrifi doirasida Shenchjen shahridagi "BYD Group” kompaniyasi bosh qarorgohida kompaniya rahbariyati bilan uchrashuv va yigirmaga yaqin hamkor korxona vakillari ishtirokida biznes-forum o‘tkazildi.

Muloqotlardan ko‘zlangan asosiy maqsad — Jizzaxda avtomobil sanoatini rivojlantirish, ishlab chiqarishni kengaytirish, mahalliylashtirish darajasini oshirish va yangi investitsiyalarni jalb etishdan iborat.

Uchrashuvda "BYD Uzbekistan” qo‘shma korxonasining ikkinchi bosqichini amalga oshirish masalasiga alohida e’tibor qaratildi. Taqdim etilgan loyihaga ko‘ra, 2029-yilga qadar avtomobillar ishlab chiqarish hajmini yiliga 200 ming donaga yetkazish rejalashtirilgan.

Loyihaning keyingi bosqichida yiliga qo‘shimcha 50–100 ming dona avtomobil ishlab chiqarish, budjetga 714 milliard so‘m qo‘shimcha tushum ta’minlash, 300 dan ortiq yangi ish o‘rni yaratish hamda 50 million dollarlik mahsulotni eksportga yo‘naltirish imkoniyatlari qayd etildi.

Kompaniya rahbariyati ishlab chiqarishni kengaytirish uchun amaldagi maydonga yaqin hududdan 60 gektar yer ajratish, ehtiyot qismlar ishlab chiqarishni mahalliylashtirish va ishlab chiqarish hajmlarini oshirish bilan bog‘liq masalalarni ko‘rib chiqish yuzasidan takliflar bildirdi.

Viloyat hokimi loyihaning ikkinchi bosqichi Jizzax iqtisodiyotini rivojlantirish, yangi ish o‘rinlari yaratish, eksport salohiyatini oshirish va mahalliy korxonalar o‘rtasida sanoat kooperatsiyasini kuchaytirishda muhim ahamiyat kasb etishini ta’kidladi. Shuningdek, bildirilgan takliflarni shaxsiy nazoratiga olishini va ularni amalga oshirish uchun zarur shart-sharoitlar yaratilishiga ko‘maklashishini ma’lum qildi.

Uchrashuvda Jizzax viloyati hokimi tomonidan hamkorlikni kengaytirishga qaratilgan qator tashabbuslar ilgari surildi. Jumladan, Sharof Rashidov tumanidagi 158 gektarlik avtomobil sanoatiga ixtisoslashtirilgan maxsus sanoat zonasiga «BYD Group” tarkibidagi korxonalar va ularning hamkorlarini jalb qilish, Jizzax kimo-industrial texnoparkida avtomobil ehtiyot qismlari va butlovchi buyumlar ishlab chiqarishni yo‘lga qo‘yish taklif etildi.

Shuningdek, tayyor avtomobillarni saqlash maydonlaridan samarali foydalanish maqsadida ko‘p qavatli avtoturargohlar tashkil etish, Jizzax viloyatida pilot loyiha sifatida 20 ta «BYD” elektr avtobusidan foydalanish, ularga xizmat ko‘rsatish infratuzilmasini yaratish va kelgusida elektr avtobuslari ishlab chiqarishni mahalliylashtirish imkoniyatlarini o‘rganish tashabbuslari bildirildi.

Kompaniya rahbariyati ushbu takliflarni atroflicha o‘rganish va istiqbolli investitsiya loyihalarini jadallashtirishga qiziqish bildirdi. Uchrashuv yakunida ishlab chiqarish quvvatlarini kengaytirish va hamkorlikni mustahkamlashga qaratilgan kelishuv bitimi imzolandi.

Tashrif doirasida tashkil etilgan biznes-forumda "BYD Group” tarkibiga kiruvchi va u bilan hamkorlik qiluvchi yigirmaga yaqin kompaniya vakillariga Jizzax viloyatining investitsiyaviy salohiyati, sanoat zonalari imkoniyatlari, investorlar uchun yaratilgan shart-sharoitlar va istiqbolli loyihalar taqdim etildi.

Muloqotlarda avtomobil sanoati uchun ehtiyot qismlar va butlovchi buyumlar ishlab chiqarish, mavjud korxonalar bilan sanoat kooperatsiyasini yo‘lga qo‘yish, ishlab chiqarish jarayonlarini mahalliylashtirish hamda yangi investitsiya loyihalarini amalga oshirish masalalari muhokama qilindi.

Forum yakunida kompaniya vakillarining yaqin kunlarda Jizzax viloyatiga amaliy tashrifini tashkil etish, sanoat zonalari va ishlab chiqarish maydonlari imkoniyatlarini joyida o‘rganish hamda istiqbolli loyihalarni amalga oshirish mexanizmlarini belgilash bo‘yicha kelishuvga erishildi.

🇺🇿Kanalga ulanish:
@jizzaxviloyatihokimi

JIZZAXDA SHIFOBAXSH O‘SIMLIK CHOYLARI ISHLAB CHIQARISH VA XALQARO SIFAT STANDARTLARINI JORIY ETILADI

Jizzax viloyati delegatsiyasining Xitoyga tashrifi doirasida "JDB Group” kompaniyasiga qarashli "Qingyuan Jiaduobao Herbs Technology Co., Ltd.” korxonasi faoliyati bilan tanishildi. Tashrifdan ko‘zlangan asosiy maqsad — Jizzax viloyatida mavjud dorivor o‘simliklar xomashosini chuqur qayta ishlash, zamonaviy texnologiyalar asosida yangi turdagi mahsulotlar ishlab chiqarish va bu borada xalqaro hamkorlikni rivojlantirishdan iborat.

Delegatsiya a’zolari korxonaning shifobaxsh o‘simlik choylari ishlab chiqarish sanoat parkidagi texnologik jarayonlarni ko‘zdan kechirib, xomashoni qabul qilish va qayta ishlashdan tortib, tayyor mahsulotni alyuminiy bankalarga quyish, qadoqlash hamda iste’molchilarga yetkazib berishga tayyorlash bosqichlari bilan yaqindan tanishdilar. Shuningdek, zamonaviy ishlab chiqarish uskunalari, mahsulot sifatini nazorat qilish tizimi va ishlab chiqarish jarayonlarini xalqaro talablar asosida tashkil etish tajribasi o‘rganildi.

Ushbu tajriba Jizzax viloyati uchun muhim amaliy ahamiyatga ega. Zero, mahalliy dorivor o‘simliklar xomashosini faqat yetishtirish yoki dastlabki qayta ishlash bilan cheklanib qolmasdan, undan yuqori qo‘shilgan qiymatga ega tayyor mahsulotlar ishlab chiqarish orqali hududning sanoat salohiyatini yanada oshirish mumkin.

Shu nuqtayi nazardan, tashrif davomida Jizzax viloyatida shifobaxsh o‘simlik choylari va qadoqlangan ichimliklar ishlab chiqarishni yo‘lga qo‘yish, mahalliy xomashodan samarali foydalanish, zamonaviy texnologiyalarni joriy etish hamda tayyor mahsulotlarni ichki va tashqi bozorlarga olib chiqish imkoniyatlari muhokama qilindi.

Bunday ishlab chiqarishni tashkil etish, eng avvalo, mahalliy xomashoning iqtisodiy qiymatini oshirish, yangi ish o‘rinlari yaratish, qayta ishlash sanoatini rivojlantirish va eksportbop mahsulotlar turini kengaytirishga xizmat qiladi. Shu bilan birga, xalqaro bozorlarda raqobatbardoshlikni ta’minlash uchun mahsulot sifati, xavfsizligi va ishlab chiqarish jarayonlarini belgilangan standartlarga muvofiq tashkil etish muhim hisoblanadi.

Delegatsiya vakillari kompaniya bilan hamkorlikda faoliyat yurituvchi ilmiy-tadqiqot instituti hamda zamonaviy laboratoriya imkoniyatlari bilan ham tanishdilar. Mazkur muassasalarda o‘simlik xomashosini tahlil qilish, mahsulot tarkibi va sifat ko‘rsatkichlarini baholash, laboratoriya sinovlarini o‘tkazish hamda ilmiy tadqiqotlar olib borishga alohida e’tibor qaratiladi.

Tashrifning amaliy natijalaridan biri sifatida Jizzax viloyatidan mutaxassislar va laboratoriya xodimlarini ushbu muassasaga yuborish, ularning malakasini oshirish hamda ilg‘or tajribalarni o‘rganish bo‘yicha kelishuvga erishildi. Bu orqali mahalliy kadrlarning o‘simlik xomashosini tahlil qilish, mahsulot sifatini baholash va laboratoriya tekshiruvlarini amalga oshirish bo‘yicha amaliy ko‘nikmalarini rivojlantirish ko‘zda tutilgan.

Mutaxassislar malakasini oshirish va zamonaviy laboratoriya tajribasini o‘zlashtirish kelgusida Jizzax viloyatida tashkil etilishi mumkin bo‘lgan ishlab chiqarish loyihalarining sifatli va barqaror faoliyat yuritishi uchun muhim zamin yaratadi. Ayni paytda, ilmiy-tadqiqot va ishlab chiqarish o‘rtasidagi hamkorlikni kuchaytirish mahalliy xomashoning xususiyatlarini chuqur o‘rganish, mahsulot retsepturalarini takomillashtirish va xalqaro bozor talablariga mos mahsulotlar tayyorlash imkoniyatlarini kengaytiradi.

Umuman, "JDB Group” kompaniyasi bilan hamkorlik doirasida o‘rganilgan tajriba Jizzax viloyatida dorivor o‘simliklarni qayta ishlash va shifobaxsh ichimliklar ishlab chiqarish yo‘nalishini rivojlantirish uchun yangi imkoniyatlarni ochadi. Eng muhimi, hamkorlikning mutaxassislar malakasini oshirish, ilg‘or texnologiyalarni o‘zlashtirish va xalqaro sifat standartlarini joriy etish kabi amaliy yo‘nalishlarga qaratilgani kelgusida aniq iqtisodiy natijalarga erishish uchun muhim asos bo‘lib xizmat qiladi.

🇺🇿Kanalga ulanish:
@jizzaxviloyatihokimi

Jizzax viloyati hokimi pinned a video

ZAFAR MUBORAK, AZIZ JIZZAXLIK PAXTAKORLAR!

JIZZAX PAXTAKORLARI ZAFARI 350 MING TONNADAN ORTIQ HOSIL, YUKSAK MEHNAT VA MATONAT NAMUNASIDIR

🇺🇿Kanalga ulanish:
@jizzaxviloyatihokimi

GONKONGDA JIZZAX VILOYATINING "SAVDO UYI” OCHILDI

Hamkorlik doirasida Jizzax viloyati hokimi va "JDB Group” kompaniyasi prezidenti tashabbusi bilan Gonkong shahrida Jizzax viloyatining "Savdo uyi” ochildi.

Mazkur savdo maskani viloyatda ishlab chiqarilayotgan mahalliy mahsulotlarni Gonkong bozoriga olib chiqish, eksport hajmini oshirish va Xitoyning boshqa hududlariga yetkazib berish imkoniyatlarini kengaytirishga qaratilgan.

"Savdo uyi”da viloyat korxonalari mahsulotlarini namoyish etish, xorijiy xaridorlarga taklif qilish va ishbilarmon doiralar bilan to‘g‘ridan-to‘g‘ri aloqalarni yo‘lga qo‘yish ko‘zda tutilgan. Bu mahalliy ishlab chiqaruvchilar uchun yangi bozorlarga chiqish, savdo shartnomalarini tuzish va eksport geografiyasini kengaytirish imkoniyatini yaratadi.

Natijada Jizzax viloyati korxonalarining tashqi iqtisodiy aloqalarini rivojlantirish, mahalliy mahsulotlarning xalqaro bozorlardagi o‘rnini mustahkamlash va yangi hamkorlik yo‘nalishlarini shakllantirish uchun qo‘shimcha sharoit yaratiladi.

🇺🇿Kanalga ulanish:
@jizzaxviloyatihokimi