Молитва Святому Духу свт. Филофея:

Царю Небесный, Утешителю Владыко, собезначальный и соприсносущный, и купносущный, и единочестный Душе Отцу и Сыну!
Душе истинный сущий, благий, Святый, господьствуяй, животворивый, Иже от Отца исходяй неизреченно, и на Сыне почиваяй нераздельно, Иже сыноположения и обожения умнаго и словеснаго естества приятен, Иже настоящих и будущих благ сокровище!
Дух правый, Дух Владычний, Иже Отеческого состава, и от Божественных и безначальных уст Его несказанно исходящее и соипостасное дыхание, и Премудрость, и Сила.
Дух Божий и от Бога, Дух Отечь и от Отца, Дух Сыновень, Дух Христов. Óна за едино существо, и еже отонуду исхождения, сия за едино существо паки и неразлучное, и еже оттуду изречение и явление.
Ты убо, благий Владыко, — Единый от Троицы Бог, истинный Бог от истиннаго Бога; разумную и чувственную тварь вкупе создав со Отцем и с Сыном и сию неизреченною премудростию и силою, и обузданием неизреченнаго промысла паче слова соокормлевая и сосвязуя, и утверждая, и соблюдая.
Безначальне, невидиме, непостижиме, недоразуменне, неизследованне, неизреченне, неизчетéнне, безчисленносильне, всемогий Господи!
Иже первее отцы и пророки различне действовав и глаголав, и Святыя Троица тайну показав, и неизреченное плотьское смотрение открыв Единочадаго Сына и Бога, последи же еже на небеса с плотию восхождения и уставления Его и в сей великий и совершенный спасительный Пятидесятный праздник, ради естественных Ти даров и благодатей, якоже существенне видом огненных язык просветив мир, и на святых апостолех и учениках сед, и Твоею боголепною силою сих оболк и исполнив пачеестественных и неизреченных благодатей, по неложному обещанию Христову, ихже ради всякое естество человеческое, веры слово приемши, истиннаго богоразумия и благочестия научихомся, и Твоею просветившеся неизреченною силою и действом, единому Богу в триех Лицех точию покланятися научихомся!
Сам убо, Владыко, озарение Отчее, живый и неизменный образ Отечь, вкупе и Сыновень; непреложный образ и печать существа и естества Их; и источник освящения и безсмертия, и жизни, еже и в будущем и непременном и безконечном веце; венец и конечное святых возприятие, в Немже Божества вина и Источник — единый нерожденный и безначальный Отец и Бог; единочадным Сыном и Богом всеблагих подаяние независтне и неизреченне, и паче естества действует, в настоящей и будущей жизни.
Приими мое грешнаго и недостойнаго моление и в сий час, Иже множество моих согрешений сведый Един! Помилуй мя по велицей Твоей милости и по множеству щедрот Твоих беззакония моя очисти, и омый наипаче тину согрешений моих, и належащую скверну страстей души моей очисти, Един чистый и пречистый; и всякия скверности и смрада, и страсти чистительный, очисти мя от тайных моих, Господи, и от чуждих избави раба Своего, грех юности моея и неведения моего и старости окаянство не помяни.
Просвети ми помраченныя мысленныя очи, и погасший светильник благодати возжег, научи ми ум искусом и обычаем, и действом — ведети, яко есть воистину в словесном естестве Дух Свят.
Даруй мне слово благосочетанно и силу, и высоту, и крепость, молитвы чистыя и простерты приносити о людех Твоих, и о всемирной Твоей Церкви и стаде, юже Твоею силою и действом, Кровию Единочаднаго Сына и Бога искупльшеюся, боголепно водрузил еси и составил.
Утверди Ея на камени исповедания Божества, непреклонну и непоколебиму, адских дверей крепчайшу, ересей безместных державнейшу и вышшу, бесовских действ и крепостей неприкосновенну и неуязвену, исполнену всячески Твоея крепости и благодати.
Приими, Царю, коленопреклонения их и стенания, общая и согласная, и простертыя молитвы, и прилежная моления, веру и надежду еже к Тебе единому неуклонно взирати нощию и днию, и ко иному не зрети, разве Тебе, Бога и Владыки, и от Тебе единаго спасения чаяти.
И, простив им и нам всякое прегрешение, вольное же и невольное, яко Бог преблагий же и всемогий, и настоящих зол премени, и присносущных благ сподоби.