Ikrom Sharif

Sukutni tanlagan inson aslida aytilishi kerak bo‘lgan hamma gapni aytib bo‘lgan.

@choydosh

#Ўйлар

Анқарага учяпман. Олдимдаги ўриндиқда 30–35 ёшлардаги қотмагина, қорачадан келган йигит ўтирибди. Қандайдир хавотирли ва ҳаяжонли кўринди. Самолётдаги одамларнинг ҳаракатларига жуда хушёр нигоҳ билан қараб қўяпти. Қўниш вақти яқинлашганда гап очдим:
— Биринчи маротаба учяпсизми?
— Нима? — деди хушёр тортиб.

Шу билан мулоқот боғланди. Биринчи учиши эмас экан, Туркияга биринчи келиши экан. Илгари Россияда ишлардим, ўн йил қатнадим, қурилишда бетон қуярдим, дейди. Охирги борганимда ҳужжат муаммоси билан узоқ муддатли депорт уришди, энди у ерга боролмайман, дейди. Шу орада Россияда танишган бир турк уни Туркияга шунақа иш учун чақирган, лекин бу умуман туркча билмас экан, таржимон иловаси орқали хабар ёзишаркан. Ҳаяжони шундан экан: ўзи билмаган мамлакатга, тилини билмаган ҳолда, битта СМС хабарига ишониб келяпти.
Аэропортдан чиқиб, автобусигача ўтирғизиб юборишимни айтиб, бироз хотиржам қилган бўлдим.

«Уйланганман, икки нафар фарзандим бор. Улар ватанда. Мен бир йилда бир маротаба келиб, бир ойча туриб қайтардим. Ўн йил шундай ишладим», — дейди.
Оилангизни ҳам олиб кетсангиз бўлмайдими, десам:
— Унда ойликни орттиролмайман-да. Ер олиб, уй кўтариб қўйдим, энди ичини битиришим керак, — дейди.

Мен шу ерига эзилдим — тирикчилик учун ўн йил оиласидан, фарзандларидан олисда, қишин-ёзин бетон қориб ишлаш…
Уйда эса, ўн йил эрини кутиб яшайдиган аёл, ўн йил интиқ бўлиб соғинадиган фарзандлар…

Бугун иш сари Яндексга чиқдим. Шопир ёш йигит, озғин. Лекин кайфияти қандайдир кўтаринки.
Маҳалладан чиқишимиз билан дўкон қаршисида бир зумга тўхтатишини сўрасам:
— Ҳов анави дўконга олиб борай, аёлим ўша ерда сотувчи. Ҳозир олиб келиб қўйгандим, — деди.
Очиғи, бироз эриш туюлди гапи. Менга нарса эмас, банкомат кераклигини айтиб, ўзим айтган жойда ишимни битирдим.
Шу билан йўлга чиқдик. Бир баҳона бўлди-ю, яна мулоқот бошланди:
— Ака, мен Яндексга энди иккинчи кун чиқишим. Беш ой уйда ётдим…
— Нега уйда ётасиз? — деб сўрадим.
— Умуртқам синганди. Кўп қаватли уйларга совутгич ўрнатаман. Учинчи қаватдан йиқилиб, белимни синдириб олгандим. Беш ой ётиб қолдим. Қанча танишларим бор эди, улардан тайинли ёрдам тегмади. Барака топсин, аёлим ишлаб боқди ҳаммамизни. Энди туриб ишга чиқмасам бўлмайди деб, қўшнимнинг ёрдами билан шу машинани тўловсиз ижарага олдим. Озгина ишлаб, белимдаги спицани олдиришим керак…

Ҳаёт, тирикчилик ўтаверар экан. Кимдир оиласи учун ўн йил юртма-юрт сарсон бўлиб, бетон қориб меҳнат қилади. Кимдир эса эри ётоққа михланиб қолган тақдирда ҳам ойлаб рўзғорнинг бутун юкини елкасига олади. Бири оиласига, фарзандларига уй-жой қилиб бериш учун узоқ ўлкаларда темир чайнайди, бири эса ўша уйнинг тасарруфини зиммасига олади, белини, сабрини тиргак қилиб сақлаб туради.
Шу шаклда эрлар ҳам, хотинлар ҳам ғамхўрлик, вафо борасида синовдан ўтиб, ўзаро аслиятларини намоён қилаверади…

@IkromSharif

Солиҳ бир зотдан сўрашди:
— Бахтли одам ким?
— Нафаси тинса ҳам ҳасанотлари тўхтамаган киши энг бахтли инсодир, — деб жавоб берди у.
—•—•—•—
Ассалому алайкум ва роҳматуллоҳи ва барокатуҳ.

Хайрли тонг!

@IkromSharif

Ҳақиқий етуклик жисмоний кўринишда эмас, балки масъулият ва олийжанобликдадир!

"Алоҳида мавзу"нинг ушбу сонида масъулиятли йигитлар тарбияси ва касбий ўсиш бўйича меҳмонларимиз Икром Шариф ва Жаҳонгир Насриддинов билан муҳокама қилдик

Суҳбат давомида сиз:

- Нега бугунги йигитлар таваккал қилишдан қўрқишади?
- Оилада ва фарзанд тарбиясида отанинг роли қандай бўлиши керак?
- Йигитлар шахсиятини қандай шакллантиради?
- Ёшликдаги қийинчиликлар ва интизом инсон иродасини қандай тоблайди?
каби саволларга жавоб топасиз.

🔥Кучли шахслар қандай тарбияланишини билиб олинг, суҳбатни томоша қилинг:
https://youtu.be/zfVF6tnIKQE
https://youtu.be/zfVF6tnIKQE
https://youtu.be/zfVF6tnIKQE

@alohidamavzu

Тарбиячининг — хоҳ у ота-она бўлсин, хоҳ педагог — мақсади болани ўзи истаган қолипга солиш эмас, балки, унга ҳаётда тўғри йўлни танлаш учун асосий қоидаларни ўргатишдир.

Чунки болани умр бўйи назорат қилиб бўлмайди. Унинг олдида ҳар куни янги вазият, янги танлов ва янги синов пайдо бўлади.

Агар бола тўғри яшашнинг асосий қоидаларини англаб олса, тарбиячи ёнида бўлмаган пайтда ҳам ўзини бошқара олади.

Шу маънода, яхши тарбия — болага тайёр жавобларни бериш эмас, унга тўғри жавобни ўзи топишга хизмат қиладиган мезонларни беришдир.

Тарбиянинг энг катта натижаси — бола сизнинг назоратингизга муҳтож бўлмай қолганида кўринади.

@IkromSharif

«Мен унинг (Хадичанинг) муҳаббати билан ризқландим».
Расулуллоҳ соллаллоҳу алайҳи васаллам.
-------------------
Муҳаббат — ризқ, катта неъмат.

@IkromSharif