السلام عليكم و رحمة الله و بركاته!

Мөхтәрәм укучым!

Бу канал төрле максатларны күздә тотып ясалды. Шулардан иң мөһиме – бу каналның мескен вә языклы авторының (исемем Азат, таныш булыйк) күңелендәге кешелек тарихына карата булган моң катыш шомлану хисенең җентекле тикшеренү теләге белән берләшү сәбәпле, хәле калганнарның да башларын әйләндерерлек дәрәҗәгә җитүедер.

Университетта көнчыгышны өйрәнү һәм илаһият гыйлеме бүлекләрендә укыйм. Гадәттә, бу сүзләрдән соң "булдыргансың инде, кем генә булып эшләрсең икән?" дигән сораулар ява башлый. Буш сорауга буш җавап эзләмичә, киләчәген гуманитар өлкәдә күргән һәр кешенең үз үзенчәлекләре – юк, бәлки юләрлекләре – барлыгын гына әйтеп узыйк. Мин исә бу сәер кызыксынуларымны артык үз эчемдә генә саклый алмаганлыгымнан, сезнең белән дә бүлешергә булдым.

Канал, беренче чиратта, тарих, сәясәт белеме һәм әдәбият белән кызыксынучыларга файдалы булыр. Язмаларның күп өлеше иске татар телендә булыр, шуңа күрә инде күптәннән бөек әдипләребезнең әсәрләрен иске сүзләр бирелгән искәрмәләргә карамыйча укырга теләгән кешеләргә бу яхшы мөмкинлек булыр, дип өметләнәм. Канал язылучыларны җәлеп итә алырмы, укучыларда кызыксыну уятырмы, кем дә булса постлар чыгуын күзәтеп барырмы – болар хакында һич фаразларым юк.

Шунысын да әйтми уза алмыйм: каналда тарихи текстлар күп булганга, һәм, белгәнебезчә, иҗтимагый нормалар шактый үзгәрүчән бер нәмәрсә булып торганда, текстларның кайсыбер өлешләре хәзерге көн күзлегеннән бераз әхлаксыз, хәтта мыскыл итә алырлык булып тоелырга мөмкин. Тарихи шәхесләрнең фикере авторныкына тәңгәл килми, шуңа "фу"ларны миңа түкмәгез ;)

Аллага тапшырып, башлыйк.

P.s. иске татарчада лонгридлар күп булачак. Сак булыгыз, көндәлек тормышыгызга да лисане кадимдән бәгъзе кәлимәләр [иске телдән кайбер сүзләр] кереп китүе мөмкин 🌝