Подо́бен: О ди́вное чудо:
Стих: Из глубины́ воззва́х к Тебе́, Го́споди,// Го́споди, услы́ши глас мой.
О вели́кое заступле́ние/ печа́льным еси́, Богоро́дице Чи́стая,/ ско́рая Помо́щнице,/ спасе́ние ми́ра и утвержде́ние,/ ми́лости пучи́на, Бо́жия му́дрости исто́чниче,/ ми́ру покро́в;/ воспое́м, ве́рнии, све́тлый омофо́р Ея,/ хва́ляще неизрече́нно:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.
Стих: А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
Ди́вный прорече́ Иса́ия:/ бу́дет бо, рече́, в после́дняя дни/ я́ве гора́ Госпо́дня и дом Госпо́день верху́ горы́;/ уви́дехом же, Влады́чице,/ о Тебе́ и́стинное сбытие́,/ го́ры бо и хо́лми украси́шася многоимени́тыми церква́ми Твоих пра́здников./ Тем ве́село вопие́м Ти:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.
Стих: Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
О чу́дное украше́ние всем ве́рным еси́,/ проро́ческое и́стинное сбытие́,/ апо́столом сла́ва и му́чеником удобре́ние,/ де́вству похвала́ и всему́ ми́ру преди́вный покро́в./ Покры́й, Влады́чице, омофо́ром ми́лости Твоея́ вся лю́ди, вопию́щия:/ Обра́дованная, ра́дуйся, с Тобо́ю Госпо́дь,// подая́й ми́ру Тобо́ю ве́лию ми́лость.
Глас 8: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.
Сра́дуются с на́ми у́мная вся чинонача́лия,/ духо́вно совоку́пльше чу́вственный лик,/ ви́дяще Цари́цу и Влады́чицу всех/ многоиме́нне ве́рными сла́виму;/ ра́дуются же и ду́си пра́ведных,/ су́щии зри́телие виде́ния/ на возду́се моле́бно простира́ющу всечестне́и Свои́ ру́це,// прося́щу умире́ния ми́ру и спасе́ния душ на́ших.
💙 Стихи́ра на литии, глас 3:
Наста́ днесь пресве́тлый пра́здник, Пречи́стая Де́во,/ честна́го Твоего́ Покро́ва./ Па́че со́лнца освеща́еши лю́ди,/ ве́рою от чи́ста се́рдца Тебе́ И́стинную Ма́терь Бо́жию испове́дающия/ и Сы́ну Твоему́ вопию́щия:/ Христе́ Бо́же, моли́твами Присноде́вы,/ чи́сто и без истле́ния ро́ждшия Тя,/ не преда́ждь враго́м ра́тующим Твое́ достоя́ние,// но я́ко Ми́лостив спаси́ в ми́ре ду́ши на́ша.
💙 Стихи́ры на стихо́вне, Глас 2:
(Лаврский напев)
Я́ко всех вы́шши су́щи Небе́сных и земны́х,/ Херуви́м сла́внейши и всея́ тва́ри честне́йши,/ Тебе́, Засту́пницу и покро́в держа́вен,/ христиа́нскому ро́ду Христо́с дарова́/ покрыва́ти и спаса́ти лю́ди согре́шшия,/ к Тебе́ притека́ющия./ Те́мже прибе́жище всем, Тебе́ воспева́ем, Влады́чице,/ и честны́й пра́здник Твоего́ Покро́ва пра́зднуем све́тло,// Христа́ моля́ще дарова́ти нам ве́лию ми́лость.
Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.
Я́ко венце́м пресве́тлым, Всечи́стая Богоро́дице,/ Покро́вом Твои́м честны́м Це́рковь Бо́жия приоде́яся/ и све́тится, ра́дующися, днесь,/ и та́йно ликовству́ет, Влады́чице, вопию́щи Тебе́:/ ра́дуйся, одея́ние честно́е и ве́нче Бо́жия сла́вы;/ ра́дуйся, Еди́на сла́вы соверше́ние и ве́чное весе́лие;/ ра́дуйся, к Тебе притека́ющим приста́нище, и избавле́ние,// и спасе́ние на́ше.