У Швабскім замку ў Бары, дзе Габсбургі атруцілі Бону Сфорца, адкрылі барэльеф у памяць пра славутую каралеву і вялікую княгіню

7 кастрычніка 2026 года, у італьянскім горадзе Бары на тэрыторыі Швабскага замка адбылося афіцыйнае адкрыццё барэльефа, прысвечанага каралеве польскай і вялікай княгіні літоўскай Боне Сфорцы. Ініцыятарам усталявання памятнага знака выступіў прэзідэнт Літвы Гітанас Наўседа ў супрацоўніцтве з дырэкцыяй італьянскага музея і Палацам вялікіх князёў літоўскіх у Вільні. Падчас мерапрыемства таксама падпісана дамова аб супрацоўніцтве паміж музеямі дзвюх краін.

Аўтарам мармурова-бронзавага барэльефа з'яўляецца літоўскі скульптар Ёнас Гянцявічус. За іканаграфічную аснову помніка ўзяты самы вядомы прыжыццёвы партрэт Боны Сфорцы — дрэварыт 1517 года, змешчаны ў гістарычнай працы Ёста Дэцыя (Justus Ludovicus Decius) «De vetustatibus Polonorum», выдадзенай у 1521 годзе ў Кракаве. Гэта аўтарскі паўтор барэльефа, які ў 2021 годзе быў усталяваны на падпорнай сценцы гары Гедзіміна ў рэнесансным садку Ніжняга замка ў Вільні.

Па перыметры барэльефа ідзе лацінскі надпіс: "BONA SFORTIA DE ARRAGONIA / DEI GRATIA REGINA POLONIAE / BARIQUE PRINCEPS ROSSANII / MAGNA DUX LITHUANIAE"

Бона Сфорца (1494—1557) стала другой жонкай польскага караля і вялікага князя літоўскага Жыгімонта I Старога ў 1518 годзе. Атрымаўшы бліскучую гуманістычную адукацыю, яна вызначалася высокай палітычнай і эканамічнай актыўнасцю.

Навіна