شێعرێ هەورامیێ

‍ تا دوورە بی جە دیدٚەی دەردٚێ گنۆنە گیانی
لاشەم کزا دەمێوەن، تۆ چی سەرێ نەدٚانی

زانی چە کاولارێ شاروو دڵی بە بێ تۆ؟
تۆ مانگەنی ئەرێ گیان ڕۆشن کەری شەوانی

وەختێ نەبی خیاڵێ با قاڵبێوە شێعری
هەرسوو چەما گنا ڕا نیشا سەروو خەزانی

تۆ فەلسەفەو بیەو من، مانا کەریوە ژیوای
زانی مەکینە وەشڵێ پەی دەردٚەکا دەوانی؟

شێوەو چەم و برۆو تۆ کریا تەتۆ جە دیدٚەم
ڕۆحم مەشۆنە قاڵب بیللا بیەن ڕەوانی

حەیران، کەلەمچە کریای کەوتینە ئێنفرادی
ئا دڵبەرێ نەپەرسا چی ئاننە بێ‌نەوانی


#حەیران_هەورامی
@hawramyanah

شیرینتەرین حاڵ

ڕۆحەکەم شیرینتەرین حاڵەی کە بۆم، ئانەن کە بەی
ئی ‌‌دڵەم پەی تۆ هەتا ئاخر نەفەس یانەن، کە بەی

تاقەتم گرد هۆرچنی پەشتەو دەلاقەو یانەکەیم
هەر بەرێنێ و پەنجەرێ چەمشا بە کۆڵانەن کە بەی

تا سەحەر گۆشم سپارد زەنگوو بەرەی، ناماینە تۆ
هەر کەسەیتەر بێژگە تۆ ئەغیار و بێگانەن کە بەی

پایێزوو عومری خەریکەن ڕێزنۆ کەم‌کەم گەڵام
ئەشقوو تۆ ژیونۆوە ئاواتوو دڵیم، هانەن کە بەی

سەردەمەی پایێز مەکێشۆ باڵوو زقمی باخەرە
ئا چنارەم زەردەن و قامەت بە گۆچانەن کە بەی

زەردەوەر حاڵم مەزانۆ وێرەگاوەختێوە تەنگ
یانە تەمیان و کپ و تاریکە هێلانەن کە بەی

تا مەنەن نوورەی جە شەمعەو زێندەگی بۆرێوە تۆ
پەی توافوو شەمعە سۆتێ، کامە پەروانەن کە بەی

تۆ ئەگەر بەینۆوە مەی هەمتەر وەهاروو دڵوەشی
سەروەشیم دیڏارتەن بێ‌ پەیک و پەیمانەن کە بەی

#ڕەحمەت_سەففاری(#شەفەق)

@hawramyanah

تازە له‌یدٚەی کۆنە ئاشنا! نای چکۆ؟
دڵ بیەن وێرانە ئاوا، نای چکۆ؟

چارە یاوا ڕاو نەیاواو غوربەتی
ئەی نزیکی دوورە ماوا! نای چکۆ؟

چەوسەری خەمباروو بەختەو دڵوەشی!
نیمەشەو تاسێت میاوا نای چکۆ؟

تەژنە‌چەم کەوتانێ وشکانێوی تەڕ
چۆڕە دیدٚارت سەراوا نای چکۆ؟

ژەم ویەردٚێونا جە دەنگیت تێر و پەڕ
گۆشێ بێدەنگیت مژاوا نای چکۆ؟

یادگارێ سەوزێ یادٚیت پێسەنێ
مێخەکێ پەی سوورەساوا، نای چکۆ؟

تاقە چکلیتوو بنەو کیسەو حەزی!
تاڵێ شیرینیت مەتاوا نای چکۆ؟

کەوتەنا وەرزوو بژاروو چرکەکا
وەختوو ژیوایو مەرگی یاوا نای چکۆ؟

ئێشێ دەمنۆ مەڵهەموو زاموو خەمیت
ئی موداوا هەر زوخاوا نای چکۆ؟

دڵ تەتۆش کێشتی جە کونجوو تۆو دڵی
تۆبەتۆ کریەینی داوا نای چکۆ؟

#خالێد_ئه‌حمه‌دی

@hawramyanah

ده‌می پاییز

شێعره‌: #خه‌میار_هه‌ورامی

ده‌نگ: #ئاراس_ئاژه‌ند

@hawramyanah

باسێ سه‌روو ڕێخه‌ئه‌ژناسای که‌لیمه‌ هه‌ورامیه‌کا و ئوستووره‌کا ئه‌چی کاناڵه‌نه‌ بواندێوه‌
👇

بەختە و خەمی وێمەردٚە دەمێن هەمسەفەرێنێ
سیــــنەو لــچە زەردٚاوە خــوێ بـێ خەبـەرێنێ

دەورانوو هەژارین و دڵێ کیسەنە مەڕیا
جەنگێ چەنوو ئێ بەختێ ئتر بێ‌سەمەرێنێ

خەیلێن کە تەقالایێ، سکاڵایێ دەس و پای
دنــیانە، ســەماواتــەوە پەیم بێ ئەسەرێنێ

وەختێ گڕە کەوتێنە دلێو جەنگەڵی سەوزی
عادین کە پەپوولێ نیەنێ و دەربەدەرێنێ

وەڵڵا بـــنـــەخاڵــوو سەبــووریــن زەردٚەخــوێما
قورعان بە قەسەم ڕەقس و سەمایێچ چەمەرێنێ ١

ئەی خەم به مەراموو دڵوو وێت گێرە یەخێما
چـــی لاشــەنە تــر ئاوەز و دڵ بــێ سـپەرێنێ

فەرقێوە کە مەردٚێوە جیا بۆوە جە زیننەی
ئانەن ئەوێما چـۆگـەنە بێ مانگ و وەرێنێ

ئشیــۆ دلــێ ژیــوایــەنـە چـن جارێ نــەژیـوی
چی دەورەنە حەی حەی بەشەرێ چن بەشەرێنێ


1.چەمه‌ری: شیوەنوو جوانەمەرگی بە شێوەو هورپڕای جە مەحاڵوو ئیلام و کرماشانینە

#ناتێق_ئه‌داک

@hawramyanh

ژیان ژان و گیانیچ بێ گیانا
سەرەم مێشۆ و بە ئاژەیچ دێویانا
زەمانە وێشۆ یاگێمان مواڕۆ
تەماموو پیاوتی ئاخر زیانا
ئەمن وینام هەتا ئارۆ ژیانا
سوادٚ پۆشیا وڕیاکاری عەیانا

ئەچێنە مەر مری ڕاست کەرانێ
بە ناچار پێسە ئەژناست کەرانێ
هەتا مانی کەسێ نامێت مەزانۆ
سەروو قەورێنێ مەر باست کەرانێ
چەمم پاکەن ئەپینیشا دیانا
جە زۆڵی هیچ مەزانوو بێ ڕیانا

جە دۆنیا ماڵ و دینارت کەسێنێ
دولارێو وێتەنێ فریادٚڕەسێنێ
زەڕت بۆ شەخسیەت ئاسان گنۆ دەس
ئەچێ پووڵدارێ واچا شاخسێنێ
ئەمن کەی پەی زەڕ و ماڵی شیانا
ئەگەرچی تێکەڵیچ بوو پەی ویانا

نەدٚارێ فرێنێ پیائیشا فەنا بی
نەدٚار ئاوارە بی، بێ سەرپەنا بی
بە عەقڵ و دانشت نمیاوی یاگێو
میاوی مەر بە زۆڵی ئاشنا بی
بە لالایی هەژاران لاویانا
هەژاری وینوو وەڵڵا ڕووسیانا

جە ڕۆحانی حەتا ڕۆحی مەکریۆم
جە بەحرینە چەنی نۆحی مەکریۆم
کە وەختێ باسوو سێدارەی مەکریۆ
بە وەڵڵا تا نماو سۆحی مەکریۆم
مەپێچیەو وێمەرە ئای ژاویانا
هەزاران پێسە ئەخبارێ کیانا

چە سەختەن ناپیا بی و وێت نەزانی
جە ئێنسانی جیا بی و وێت نەزانی
مەزانۆ ناپیان ئەمما عەزابەن
حەرام و زۆڵەزا بی و وێت نەزانی
ئەپێسە تۆ مەوینیم مافیانا
سوێڵێت بانێ واچینە پیانا !

جە قێڕەو قاڵوو قاڵاوی مەتەرسوو
جە لێڵایی دەرەو ئاوی مەتەرسوو
مەتەرسوونە جە گێجەو سیروانی
ئەمن حەتتا جە ماساوی مەتەرسوو
بە زاهێر خۆ مواچی ئەولیانا
تەماموو ژینی ئەم پێسە ژیانا

چکۆ بەی شێعرە پەی شادٚی بواچم
قەسیدێوە جە ئازادٚی بواچم
مەزانوو تا مەنێنم ئێمە مەشیۆ
بە هەجوە دادٚوو بێدادٚی بواچم
بە شێعرە سەیێدٚیچ نەرم و نیانا
دماو ئی شێعرێ واچان بێ حیانا

#سه‌یێد_ڕه‌حمان_مه‌حموودی


@hawramyanah

هەی دادٚ و هەی مەدەد من و بەختێ ڕەوانیەم
مێوە و گنۆوە تۆقوو سەرەیم بەرزەقانیەم

ئەی بایەقوش! مەنەن خەبەرێ تاڵتەر هەڵای؟
بۆ! نازی وشکە بۆوە ڕوەی ئەرخەوانیەم

ئاواتوو مانگێ واسم و واران نەسیب بی
یاوێنە هەوری ئجیۆ دوعای ئاسمانیەم

بێزاروو ڕۆی، وەختێ نەیارێ گنا جبەر
وەشڵەی شەوێوە تارێ، ڕەفێقێ گیانیەم!

نیمەو شەوێ خیاڵێ کە گێرا دلێو بەرەی
زانۆ ملۆ فەرێحێ خەفەتبارێ فانیەم

کەستەر مەوینوو شاروو غەوارانە دڵ بەرۆ
ئجیۆ لوێنە دڵبەرەی ئەبرۆ کەمانیەم

سا پەی وەشیو ڕواڵەتی لار و لوێروو من
وێت بەشکە، وەش قەوارەتەرین! بی مزانیەم

بۆ وێت بە قاڵوو خەڵوەتی تاریک و کۆروو من
نا! مەر تۆ وێت نەبێنی جە حەر سات و سانیەم؟!

واتم خەمی بە عادەتوو مێمانی نیشه، نیشت
گول سۆچنۆم خۆڵکێ گولێ سەرزوانیەم

سا چێش دەوا کەریوە؟ چەنی مەرهەمێ مدٚەی؟
دەردٚێ گرانێ بێ‌سرەوێ کەس نەزانیەم

شێعره‌ و ده‌نگ: #حافێز_ئەحمەدی

ڕیک وستەی: #موسلێم_ئەحمەدی

@hawramyanah

ئازیزم! ئامای؟! ئای بێقه‌رار بیم
ئای ئای چه‌مه‌ڕا، ئای ئێنتێزار بیم

مه‌وته‌نه‌که‌ی چه‌م دیدٚه‌ش ها نه‌ ڕێت
غه‌ریبی تا که‌ی؟ بۆ وه‌ ماوای وێت

های ساقی! بازار جێلوه‌ی دڵداره‌ن
سه‌ودٚای خه‌ریدار دانه‌ی دیداره‌ن

یه‌کێ وه‌ مایه‌ی گه‌نج «که‌ی»ه‌وه‌
چوون منیچ وه‌ تای فه‌رتووت نه‌یه‌وه‌

ئه‌رسه‌د هه‌رکه‌سێ په‌ی وێش وه‌ داوه‌ن
وه‌ قیمه‌ت نیه‌ن، ئێخلاس حه‌ساوه‌ن

مایێل که‌ر باڵات وه‌ی لا و لا چوون نه‌ی
ده‌سێوت ده‌ف بۆ ئه‌و ده‌س جام مه‌ی

با بێدٚار که‌رۆ تا که‌ی بۆ غافڵ
ده‌ف وه‌ سه‌دٚا گیان، جام وه‌ ڕه‌شحه دڵ

با کڵافه‌ بۆ ئاخر له‌وانم
خاک پای حه‌زره‌ت پیر موغانم

چوون ده‌ف به‌رگ پۆس ئێرادٚه‌ت پۆشم
غوڵام به‌رده‌س حه‌ڵقه‌ نه‌ گۆشم

خوم‌ئاسا خه‌یلێن وه‌ته‌ن مه‌یخانه‌م
چوون پیاڵه‌ واق شیشه‌ و په‌یمانه‌م

#مه‌وله‌وی


@hawramyanah

دڵشا بەرد٘ەنا، چەرمای چەمەکات
شێتشا کەرد٘ەنا، دەسە گەرمەکات

چەمە مەسەکات، منشا بەرد٘ەنا
بە گیانت باوان، پەی تۆ مەرد٘ەنا

چەمێش دێونانا، سەرپۆشوو سەرەیت
عەترئەفشانم کەرد تا وەروو بەرەیت

زڵفێت بەڕەزا و بەرزەڵنگ شێوە
وەشا ئا وەختە، بنیشمێ پێوە

با وەهار بەیوە، دەسگیران ئاسا
بلمێ نە پای هەرد، کەرمێ تەماشا

باقێو بەڕەزا و سوورە هەراڵە
پێشکەشوو باڵایت، پەڕ خەت و خاڵە

چەم چەمەڕاتا، ئەی هەرچی کەسم
ئەگەر تۆ نەبی، گێریۆ نەفەسم

#هومایوون_موحەممەدنژاد
@hawramyanah

دەسم گێرە هەتا مەرگوو هەناسام
بەرەم تا ئەوپەڕوو یانەو هەواسام

وزەم خەلسەو مەسیێوی بێ‌سەرئێشەی
حەزێو لاونۆ بە لای‌لایە خوراسام

کەرەم ساکوو سەروو شانەو نەرێوی
بە سەمفۆنی شنێو تەکنۆ تەناسام

گنوو تۆڕەو حسێوو ئەرخەوانی
دەموو ڕۆخانەیەو گێڵنۆوە باسام

نەخەیر با وەردڵێو بوو پەی وەریوی
سەباحانێو بە خەیر بدٚیۆنە واسام

ئەگەر پێشێم بەرۆ واو ڕاو مەزاری
هەڵای ئێشێم مەنا پەی باس‌ و‌ خواسام

دماو وێم بەی و جەمێ باوە ڕەفێقێ
کیانەم پەی بەشێوە، دەوش بە تاسام


#خالێد_ئه‌حمه‌دی

@hawramyanah

وەرمێ مەڕیانە شەوێ چۆڵێ کپێ سەختێرە
قەرزە دەرمانێ ملا پاڵوو ونێ نەختێره

حەر درەختێوە کە زمسانێنە چەرمەی پۆشۆ
حەسرەتێ مێنێ بە پابۆسۆ جە پاتەختێره

ماتڵوو دڵوەشی بەڵکوو نەفەرێ بارۆش پەیم
دڵ پڕووزیا خەبەرێ ناوەشێ ناوەختێرە

مەگەرش بێ دەسەڵاتێوە نەرەی وشکوو کۆی
وەختێ ویناش نەچیرێوە گنێ سەختێره؟

قسمەت ئی جارە جە وێم بێ دەس و پاتەر، گومتەر
سا هەڕەو کۆگەی ئێتر کەرمێ سەرەو بەختێرە

شێعرە و دەنگ: #حافێز_ئەحمەدی

ڕیک وستەی: #موسلێم_ئەحمەدی

@hawramyanah

گۆشم چەمەڕاو دەنگ و نەواو تۆن
چەمم چەمــــەڕاو چرپێوە پاو تۆن

کەرەم فــــەرماوی چەکەریەی دڵمۆ
ڕۆحم بارمتە و ڕەهنوو چەماو تۆن

✍️ #شارۆ

@hawramyanah

وێرەگانەو بێکەسی

وێرەگانەو بێ‌کەسی کێ تیشک و دیڏارش دیەن؟
کێ جە ئی تۆزێنە ڕەنگی سوور بە ڕۆخسارش دیەن؟

تاسەمەن شنیۆ گیانی یەک هەناسەو دڵوەشی
حەیف جەوەرپەنگوو شنەی دڵ بەرزەدیوارش دیەن

ڕاڕەوو ئی‌ ڕایە هەرچن تاسەبارێوەن بەڵام
ئاڏ جە پاڵوو هەر حەزێوەش پیرەکەمتارش دیەن

هەرکە بێ میراوو جۆی وشکاوە ئەورێ سەرچەمەی
سا ئەگەرچی باخەوان وەرمەی بە ڕووبارش دیەن

چێگە نان و ڕشوە باوەن تا بلی سردێرە سەر
پەی دز و تاڵانکەرەی دوورۆوە ئەنبارش دیەن

مانگەشەو مەڏیۆرە واری پێسە کێشکچی شەوێ
داخەکێم هەرگیز نەواتش دز جە کام شارش دیەن

ئەی فەڵەک! چاوەختە داخێ سۆچنان ئۆخەی جە دڵ
ئی دڵەی مێحنەت‌زەڏەم تا ئیسە ئازارش دیەن


#ڕه‌حمەت_سەففاری(#شەفەق)

@hawramyanah

"هانەو بڵ"ی

ئاخ پەی ویەردٚەو هانەکەو بڵی
جەسەم شادٚ کەرێ، هەر پێسەو گوڵی

هانە وەشەکەو قەدٚیم جارانی
فێنکی وزێ، جەسە و هەم دڵی

بەیدێ با بلمێ ساتێو دیدٚارش
فرێحە وزمێ، یانە و مەنزڵی

هەرزەلە بەسمێ پا ملەگاوە
وەرانوەر هەجێج، هەوارگاو خێڵی

بنیشمێ وە شادٚ خەفەت لا بەرمێ
هۆردەیمی دەوار، هەواروو کێڵی

#هومایوون_موحەممەدنژاد

@hawramyanah

تۆ چەمێت پێسەو شەراوی مەس کەرا
ئا چەمێ بدٚیا، شەراویچ هەس کەرا

چا پیاڵا ئەر پیاڵێوەم گنۆ
ئا پیاڵێ ئی چەما نەوڕەس کەرا

پا چەما تیرێ، بیاونیما فەنا
ئا چەمێ دیدٚێ کوشا، ئەنقەس کەرا

تا چەمێم بدٚیا چەمانت نوورەکێم!
ئا چەمێ دیدٚەو کەسی، بێکەس کەرا

چا چەما ڕەنگوو چەما یاوا چەمام
ئی چەمێ مەدٚیانێ هەر وەس‌وەس کەرا

پێسە ڕۆجیاری پرۆشەت دا چەمام
ئا چەمێنێ ئی چەما قەقنەس کەرا

چەم چەموو تۆن و چەموو سەیێدٚ جە تۆن
پەوکەتەی دیدٚێم بوینات مەس کەرا

#سه‌یێد_ڕه‌حمان_مه‌حموودی
@hawramyanah

من و تۆ،

من و تۆ
تەنیا و بەس
باڵێ گێرمێوە
ڕوو بە ئاسمانوو وەشەسیایی
سەربەستیما نەکریۆ کەلەپچە و
پاوەن
بیاومێ ئاسۆگاو تەختی،
چێگە!
یاوان کۆپڕ وەشبەختی.
دوورێ گنمێوە جە تەنافەو سەختی.
ئی وەڵاتە، کە حەر ئەجۆ بەهەشتا
دەسوو ناحەزاوە کەوتە و کەنەفتا

من و تۆ و بەس
بازدەموو خەمانە ئازادٚ کەرمێ نەفەس
بازمێ جگا دنیای پەڕ خەمی
ئێتر چی کاولاوێنە
هۆرمەگیریۆ کۆڵی قورسوو ماتەمیی
شانەو حەقیقەتی لار بیەن
جە تاوەو سەنگینی ستەمی
نان تێکەڵوو ونێن
ویژدان ئاوەڕووش شیەن، چە ڕسوان ڕاساڵی!

من و تۆ و بەس
بازمێ جگا، ئۆکسیژن گڵوەو بێتاوانیەنە
یاوان تەنگی نەفەس
پا هۆرگێرمێ بلمێ دێرا
هەژار ئاوران، دارا سێرا
جوان کێشیان لێواروو مەرگی
شەرم نەمەن پینە نمەکریۆ دڕیای بەرگی
ئای چننە بێزارەنا
دڵی پەڕ، چەمێ هەرسینێ، بە تیرەو ناکەسا کۆڵەوارەنا
من و تۆ و بەس،
دەسم گێرە، حیچ بازگێوەنە نەمدرمێرە
وات و واچما با نەژنەویۆ
قفڵێو دەیمێ سەروو زوانی
پەی چن وەختا
وێما بسپارمێ بە گێلێ و نەزانی
چوونکە ئەچی دەورانەنە
هۆشیار زوو گنۆنە دامی
ئێما و ئێشارە وزمێ یاگێو نوکتە و کەلامی
تەنیا من و تۆ و بەس...

#ڕه‌عنا

@hawramyanah

نەووەهار و وەروێ تازێ و چایی داخ تا سەر مەبا
گوڵعوزار و دڵنەوازێ و سه‌وزه‌ باخ تا سەر مەبا

ئێدٚ بە مڵکوو نەوجوانیم ئەو بەهانارنجوو تۆ
چایی داخیچ پەی شەرابیم عەینوو چاڵوو زنجوو تۆ

واتەبێم هەر زوو بە بابایم باسوو عەشقیم پەی کەرۆ
باسوو ناروو دوری یاری پێسه‌ مه‌شقیم پەی کەرۆ

تۆ قەراخوو ئاسمانی دەفتەروو عەشقوو خەما
تۆ هەسارەو نەوسووەیلی هەرسوو گۆشەو ئی چەما

مەکتەبوو تۆ هەر مەبەسیۆ چارەو ئێمەیچ هەر وەناین
ئاوی زاتش پەی لواین و مدرۆوە ئاخر گەناین

تۆ وەکوو شەوبۆ دەدەی پێم دەرسی عەشقان هەر لە دوور
شەو بە هاتن بۆنی زوڵفت ڕۆ بە ڕەنگی لێوی سوور

#بورهان_حوسه‌ینی

@hawramyanah

نازەنین! نازت بە چن؟ جیاتی چەکی گیانی کێشوو
تاڵ بە تاڵ،  تاڵی شەوات تاتا بکێشوو موو بە موو

دیدٚە وەش! کلنی چەمێو، تاوان تەوانش کێشۆ سەر
سەر بە سەر، شەو دەیمێ سەر  کەیف و وەشیما دوو بە دوو


#شارۆ

@hawramyanah