🟥
🔹زنگانلی عبدالله فرجی «اینجیک»دن بیر شعر
رندانه اويناق
🔻طاقتیم طاق اولدو داي، پروانه‌لرله سیرداشام،
گؤر نئجه ديوانه‌يم، ديوانه‌لرله سیرداشام.
🔻آيريليق دونياسی‌نين، پئشمانچیلیق‌دیر حاصيلي،
سئومه بير افسانه‌دير، افسانه‌لرله سیرداشام.
🔻باده‌نين صافين گؤروب، دُردون دا چوخلو چكميشم،
يوخدور هئچ قيمت وئرن، غمخانه‌لرله سیرداشام.
🔻تار- تانیشلاردان محبّت، گؤرمه‌يیب كؤنلوم منيم،
تار- تانیش‌دان اينجيمیش، بيگانه‌لرله سیرداشام.
🔻دوز دئييبدیر کیم دئسه، گنجين يئري ويرانه‌دیر،
سؤکموشم كؤنلوم ائوين، ويرانه‌لرله سیرداشام.
🔻هر يارانميش‌دان قاباق، عشقين يارانميش گؤرموشم،
عشقي چوخ كيپ توتموشام، جانانه‌لرله سیرداشام.
🔻قورجالانمیشدان دوشوب، بير قورجاناق اودلانميشام،
قور ساچان خال خاطري، بير دانه‌لرله سیرداشام.
🔻زاهدا يورما چنه‌ن، ائتمز افاقه بوش سؤزون،
بئل‌لرين برك باغلايان، مردانه‌لرله سیرداشام.
🔻بيلمه‌ديم بير گون دئديم، بير واعظه آغ‌دير قاتيق،
داي دئمم بير ده اونا، پيمانه‌لرله سیرداشام.
🔻رندلر سؤيلرديلر، ياريم گلير ميخانه‌يه،
ايندي ياري گؤرمه‌یه، ميخانه‌لرله سیرداشام.
🔻گزميشم چوخ يئرلري، آواره ديل‌دن دوشموشم،
توتماغا، یاردان سوراق، حیرانه‌لرله سیرداشام.
🔻ياريمين بزمينده بير، رندانه اویناق گؤرموشم،
اول «نسیمی» بنزه‌ری، رندانه‌‌لرله سیرداشام.
🔻قوي دئييم سون سؤز، توکنسين سؤزلريم،
انسانين قدرين بيلن، فرزانه‌لرله سیرداشام.
🔻«اينجيگ»م تور ييرتيليب، باخ گؤر نه آزاد اولموشام،
شوكرو واردير بو ايشين، شكرانه‌لرله سیرداشام.
#زنگان_شاعیرلری
#هفته‌نامه‌گاوازنگ
https://t.me/gavazangzn
Post #178
31
- ❤ 5