#САВОЛ_ЖАВОБЛАР

МАСЖИДДА ОЁҚ КИЙИМЛАРНИНГ АЛМАШИБ ҚОЛИШИ

САВОЛ: Масжидда кўпчиликнинг оёқ кийимлари бир хил бўлгани учун алмашиб қоляпти ва бу ҳолат кўп ҳолларда кейинроқ маълум бўляпти. Шу ҳолат юзага келса нима қиламиз? Масжидга олиб келиб қўямизми ёки камбағалга берамизми ёки кийиб юрсак ҳам бўлаверадими?

ЖАВОБ: Бисмиллаҳир Роҳманир Роҳим. Кўпинча одамлар саволда айтилгандек, бир хиллигидан ёки қоронғуликдан ё бепарволик қилиб бошқа одамнинг оёқ кийимини кийиб кетадилар. Бундай ҳолатда агар оёқ кийими алмашган одам кейинги намозларга келиб, ўзининг оёқ кийимини топа олмаса, ўрнига қолиб кетган пойабзал у учун топилма ҳукмида бўлади. Ушбу оёқ кийимни ўша ерда эълон бериш ва масжид мутасаддиларини хабардор қилиш орқали, эгасини топишга ҳаракат қилинади. Энди эгаси чиқмаса керак деган фикрга келадиган муддатгача эълон қилинаверади. Шундан кейин ҳам эгаси чиқмаса, топиб олувчи муҳтож бўлса ўзи кийиши, бой бўлса, бирор муҳтожга садақа қилиши мумкин бўлади.

Шуни яхши билмоқ лозимки, бу ҳукмлар оёқ кийимини бировлар кийиб кетган одамга тегишли. Булардан бировнинг оёқ кийимини кийиб кетиш мумкин экан, деган ҳукм чиқарилмайди. Аксинча, мусулмон киши ҳар ишда ҳушёр бўлиши ва тўсатдан адашиб кийиб кетган қолганда дарҳол ўз оёқ кийимини олиши лозим бўлади. Топа олмаганда юқоридаги кўрсатмаларга амал қилади. Валлоҳу аълам.

Ўзбекистон мусулмонлари идораси
Фатво маркази.

✈️Telegram 👤Facebook 🎥Youtube 📸 Instagram

Дўстларингизга ҳам улашинг:
https://t.me/joinchat/AAAAAEGj0hkBXGlopIDbXA