ከ800 በላይ የቱሪስት መስህቦች ተለይተዋል
++++++++++++++++++

#ጋዜጣ_ፕላስ | በኢትዮጵያ የሚገኙ የቱሪስት መስህቦችን ለመለየትና ለመመዝገብ በተከናወኑ ስራዎች እስካሁን ከ800 በላይ የመስህብ ቦታዎች በሦስት ደረጃዎች ተለይተው መመዝገባቸውን የቱሪዝም ሚኒስትር ሰላማዊት ካሳ ገለጹ፡፡

ሚኒስትሯ የሕዝብ ተወካዮች ምክር ቤት ዛሬ ባካሄደው 17ኛ መደበኛ ስብሰባ ላይ ተገኝተው ከምክር ቤት አባላት ለቀረቡላቸው ጥያቄዎች በሰጡት ማብራሪያ፣ በመላው ኢትዮጵያ የሚገኙና እስካሁን ያልታወቁ የቱሪስት መስህቦችን የመለየትና የመመዝገብ ሥራ በበጀት ዓመቱ በስፋት ሲከናወን ቆይቷል።

በዚህም እስካሁን ከ800 በላይ የመስህብ ቦታዎችን በመለየት በሦስት ደረጃዎች መድቦ ማስቀመጥ መቻሉን ጠቁመው፤ እነዚህ ደረጃዎች የተለዩት የመስህቦቹ የመልማት አቅም፣ ከየአካባቢው ያላቸው ተደራሽነትና ሊሠራባቸው በሚችሉ ዝርዝር መስፈርቶች መሠረት መሆኑን አስረድተዋል።

የተለዩ ሀብቶች በትንሽ የኢንቨስትመንት ድጋፍ መልማት የሚችሉ መሆናቸውን የጠቀሱት ሚኒስትሯ፤ የመስህቦቹን መገኛና ዝርዝር ሁኔታ ማወቅ ለዘርፉ ልማት መሠረታዊ ጉዳይ መሆኑንም አመላክተዋል።

ለዚህ የልማት ተግባር ስኬታማነት ከፌዴራልና ከክልል መንግሥታት እንዲሁም ከሕዝቡ የሚጠበቀውን ድርሻ የማስተባበር ሥራ እየተከናወነ እንደሚገኝ ተናግረዋል።

በሀገሪቱ ያሉ የቱሪስት መስህቦች 800 ብቻ እንዳልሆኑ የገለጹት ሰላማዊት ካሳ፤ አሁን የተከናወነው የመለየት ሥራ የመጀመሪያ ዙር መሆኑንና በቀጣይም ተጠናክሮ እንደሚቀጥል አረጋግጠዋል።

ሚኒስቴር መስሪያ ቤቱ እነዚህን ሀብቶች በማልማትና ለቱሪዝም ክፍት በማድረግ ረገድ በቀጣይ ልዩ ትኩረት ሰጥቶ እንደሚሠራ አስገንዝበዋል።