Ассалому алайкум, азиз сирдарёликлар!

Ҳурматли Президентимизнинг юксак ишончлари билан бошқа вазифада фаолиятимни давом эттириш олдидан сизларга чуқур ҳурмат-эҳтиромим ва самимий миннатдорлигимни изҳор этаман!

Мен бошқа вилоятда туғилиб ўсган бўлсам ҳам, меҳнат фаолиятимни шу қутлуғ заминда бошлаганман. Катта ҳаёт сари илк қадамларимни бағрикенг ва меҳнаткаш сирдарёликлар билан бирга ташлаганман. Бу ерда кўп инсонлардан сабоқ олганман. Уларнинг тажрибаси ва маслаҳатлари халқ ишончига муносиб бўлиб ишлашда менга асқотган. Шунинг учун бу юрт мен учун жуда қадрли.

Кейинги салкам икки йил давомида яна сизлар билан бирга ишлаш насиб этди. Айниқса, ҳурматли Президентимизнинг алоҳида эътиборлари туфайли Сирдарёнинг қиёфаси янгиланиб, саноат ривожланаётгани, одамларнинг турмуши ўзгариб, эртанги кунга ишончи ошаётганига гувоҳ бўлдим.

Сизлар билан ёнма-ён ишлаб, сирдарёликларнинг нақадар меҳнаткаш, фидойи ва ватанпарвар эканига, биргаликда катта мақсадларга эришиш мумкинлигига яна бир бор амин бўлдим.

Мен ўзимни Сирдарёнинг ҳам фарзанди деб биламан. Бу элга доимо таъзим қилиб, чексиз ҳурматим ва миннатдорлигимни билдираман!

Қаерда, қайси вазифада ишласам ҳам, бу заминни янада обод қилиш, сирдарёликларнинг турмуш фаровонлигини юксалтиришга ҳисса қўшишни ўз бурчим деб ҳисоблайман!