ДУМ РФ татарча

Коръән нәсыйхәте
Ялгышларның авырлыгыннан котыл:
 
قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ
 
Минем мөэмин бәндәләремә әйт: «Ий бәндәләрем, гөнаһ кылып үзегезгә зарар иткән булсагыз, Аллаһның рәхмәтеннән өмет өзмәгез, чөнки Аллаһ бар гөнаһларны ярлыкый!» Һичшиксез, Ул – Гафу итүче, Рәхимле («Әз-Зүмәр» (төркемнәр) сүрәсе, 53 нче аять).
 
Җомга көн мөбарәк булсын!
 
@DUMRF_TAT

РФ мөселманнары диния идарәсенең административ бинасына яңа ярымай куелды
Ярымай кую бинаны яңартуның соңгы этапларының берсе
21-23 сентябрь көннәрендә Мәскәүдә, «Ватанның рухи терәге: Ризаетдин Фәхретдин мирасыннан башлап Россиянең гражданлык бердәмлегенә кадәр» дигән темадагы халыкара вәкилләр катнашында уздырылучы Бөтенроссия форумы программасы эчендә РФ мөселманнары диния идарәсенең административ бинасының гөмбәзенә ярымай кую тантанасы да уздырылды.

Тантаналы чарада диния идарәбезнең рәисе, баш мөфти шәех Равил Гайнетдин, аның беренче урынбасары мөфти Дамир Мөхетдинов һәм идарәнең башка җаваплы җитәкчеләре, төбәк мөфтиләре, имам-мөхтәсибләр һәм имамнар, пленумда катнашучылар катнашты.
Алар күмәкләшеп әйткән тәкбир сүзләре астында алтынга манылган ярымай гөмбәзгә куелды. Төзекләндерелгәннән соң бинаның мәйданы якынча 600 квадрат метрга артты.

@DUMRF_TAT

Баш мөфти шәех Равил Гайнетдин чыгышында хәбәр иткән кайбер мөселман объектларының ниятләнгән күренешләре:
🌙 Донецк Җәмигъ мәчетенең эчке бизәлеше,
🌙 Касыйм шәһәрендәге Шаһгали хан һәм аның гаиләсе төрбәсе,
🌙 Түбән Новгород Җәмигь мәчете комплексындагы Ислам мәдәнияте үзәге.
ИншәАллаһ, бу биналар халыкка динебезнең гүзәллеген дәгъват кылу эшен камилләштерергә ярдәмче булыр.

@DUMRF_TAT

​​Мөфти Гайнетдин Россия өммәтендәге
инфраструктура һәм белем бирүнең яңарышы турында

Мәскәү Җәмигъ мәчетендә «Ватанның рухи терәге: Ризаетдин Фәхретдин мирасыннан башлап гражданлык бердәмлегенә кадәр» дигән темага халыкара вәкилләр катнашында уздырылган Бөтенроссия форумында РФ мөселманнары диния идарәсе рәисе, баш мөфти шәех Равил Гайнетдиннең чыгышыннан бер өзек:

🎙«Үткән елның декабрендә төзекләндерелгән «Беренче татар мәчете»ндә беренче җомга намазын үткәрдек. Бу Мәскәүнең хәзерге Тарихи мәчете. Аның комплексында эшләр әле тәмамланмады: хәзер ТР ярдәмендә Ерзиннар төзеткән тарихи мәдрәсә бинасында төзекләндерү эшләре алып барыла.

🟩Донецк Җәмигъ мәчетендә торгызу эшләре тулы көчкә бара. Аңа беренче ракеталар 2014 елда ук төшкән иде, 12 ел буе эшләмәде.

🟩Якын арада Касыйм шәһәрендәге, Россиянең үзәк-европа өлешендә сакланып калган иң борынгы мөселман гыйбадәтханәсе - Хан мәчетендә һәм 2 хан тәкыйясендә төзекләндерү башланачак.
Касыймның Яңа мәчетендә төзекләндерү-торгызу эшләре тәмамланды.

🟩Киләсе елга Түбән Новгородның Ярминкә мәчете төзелүгә 200 ел тула. Хәзер әлеге гыйбадәтханә яңадан тергезелә, ә Түбән Новгород Җәмигъ мәчете комплексында Ислам мәдәният үзәге төзелә».

@DUMRF_TAT

«Аллаһ безнең белән!»
Бүген, 22 сентябрьдә Мәскәү Җәмигъ мәчетендә «Ватанның рухи терәге: Ризаетдин Фәхретдин мирасыннан башлап гражданлык бердәмлегенә кадәр» дигән темага халыкара вәкилләр катнашында Бөтенроссия форумы уздырыла
 
Әлеге чара РФ мөселманнары диния идарәсенең пленумы белән XII Фәхретдин укуларын берләштерә.

Мөселман мәҗлесләренең күркәм гадәтенә тугры калып, чара Коръән аятьләрен укып башланды. «Әт-Тәүбә» сүрәсенең 38-40 нче аятьләрен Свердловск өлкәсе мөселманнары диния идарәсе рәисе Рушан Камалетдинов ирештерде.

@DUMRF_TAT

Аллаһ Расүленең тормыш юлын беләбезме?
Мәскәү Җәмигъ мәчете имам-хатыйбы Ислам Зариповның җомга вәгазеннән бер өзек.
18 сентябрьдә Россия башкаласының җәмигъ мәчетендәге җомга чараларын Ислам хәзрәт җитәкләде.
Аллаһ йортында вәгазьләрне татарча башлау горефе беркайчан да өзелмәде, хәзер дә саклана.

@DUMRF_TAT

Коръән нәсыйхәте
Әле соң түгел

حَتَّى إِذَا جَاء أَحَدَهُمُ الْمَوْتُ قَالَ رَبِّ ارْجِعُونِ
لَعَلِّي أَعْمَلُ صَالِحًا فِيمَا تَرَكْتُ

Аларның берәрсенә үлем килгәч, [кылган гамәлләренә үкенеп] әйтер: «И Раббым! Мине кире кайтар!
Бәлки, мин калдырып киткәнемдә изге гамәл кылырмын» («Әл-Мүэминүүн» сүрәсе, 99-100 нче аятьләр).

Җомга көн мөбарәк булсын!

@DUMRF_TAT

​​18–20 сентябрьдә узачак сайлаулар уңаеннан
Россия Федерациясе мөселманнары диния идарәсе рәисе, баш мөфти шәех Равил Гайнетдин мөрәҗәгате 

Хөрмәтле ватандашлар! 
Илнең төп закон чыгару органы – Дәүләт Думасы депутатлар составын сайлау, шулай ук аерым федерация субъектларында төбәк закон чыгару органнарына, депутатларның муниципаль советларына сайлаулар һәм төбәк башлыкларын сайлау буенча өч көн дәвамында тавыш бирү булачак. Әлеге сайлауның һәрберсенең нәтиҗәсе үз дәрәҗәсендә бар илнең, аның төбәкләренең, зур һәм кечкенә торак пунктларының, гаиләләребезнең, җәмгыятьләребезнең һәм хезмәт коллективларыбызның киләчәгенә йогынты ясаячак.
Россиягә кушылганнан соң беренче тапкыр уздырылачак сайлауларда Донбасс һәм Новороссия халкының катнашуы аерым әһәмияткә ия. 

Россия Федерациясе Президенты Владимир Путин игълан иткән
Россия халыклары бердәмлеге елында һәр ватандашыбызны үзенең гражданлык бурычын үтәргә, сайлау участогына килергә һәм кадерле Ватаныбызның һәм безгә алмашка килүче буыннарның киләчәге турында кайгыртып намусы кушканча, тавыш бирергә чакырам.
Сайлау – милләтебезгә һәм динебезгә, җәмгыятьтәге дәрәҗәбезгә һәм һөнәребезгә карамастан, безнең уртак бурычыбыз. Бу әһәмиятле көннәрдә без гражданлык аңын һәм бердәмлекне күрсәтергә тиеш һәм, ышанам, әлеге эштә уңышка ирешербез. 

Баш мөфти шәех Равил Гайнетдин
Россия Федерациясе мөселманнары диния идарәсе рәисе

@DUMRF_TAT

​​Күренекле журналист, университет мөгаллиме һәм җәмәгать эшлеклесе Рафаил Исхаков вафат
Рафаил Лотфулла улы Исхаков филология фәннәре кандидаты, Урал федераль университетының доценты иде, ул агымдагы елның 16 сентябрендә каты авырудан соң 72 яшендә вафат булды
Милләттәшебез 1954 елның 6 апрелендә Башкортостанның Первомайский бистәсендә туган.

Рафаил әфәнде 1976 елда Урал дәүләт университетының журналистика факультетын тәмамлаган. Аның гамәли журналистикада мөхәррирлек эшчәнлеге төбәктәге «На смену!», «Уральский рабочий», «Рабочее слово» матбугат чаралары һәм Урта Урал китап нәшрияты белән бәйле. 

1994 елдан Рафаил Лотфулла улы университетта мөгаллимлек эшчәнлеген башлый, вакытлы матбугат кафедрасы доценты дәрәҗәсенә кадәр үсә. Аның шәкертләре остазларын һөнәри яктан югары бәяли һәм кеше буларак күркәм әхлаклы шәхес итеп искә ала. Университетта эшләү дәверендә Рафаил Исхаковның 5 китабы һәм 83 фәнни мәкаләсе бастырылган. Һөнәри хезмәте өчен ул федераль министрлыкларның бүләкләренә лаек булган белгеч. 

Милләттәшебез Рафаил Исхаковның тормышында иҗтимагый эшчәнлек аерым урын алып торды. Ул Екатеринбург татар һәм башкорт мәдәнияте җәмгыятендә рәис урынбасары, Свердловск өлкәсе татар конгрессы идарәсенең әгъзасы һәм Милли көрәш буенча өлкә федерациясенең матбугат сәркатибе булды. Аның «Хәтер китабы» дигән авторлык проекты үзе бер батырлык чагылышы булды. Рафаил әфәнде әлеге китабында Бөек Ватан сугышына Свердловск өлкәсеннән чакырылган, һәлак булган 6 833 татар турында мәгълүмат бирә. 
Гомеренең соңгы көннәрендә ул Урал федераль университетының журналистика факультеты энциклопедиясен туплау белән шөгыльләнгән, хезмәттәшләре әйтүенчә, Рафаил Лотфулла улы хәтерне кадерләп саклауга аеруча зур игътибар биргән. 

Мәрхүм белән хушлашу 19 сентябрьдә узачак. 

РФ мөселманнары диния идарәсе рәисенең беренче урынбасары, МИИ ректоры, профессор Дамир Мөхетдинов Рафаил Лотфулла улы Исхаковның вафаты сәбәпле тәгъзия белдерде 

Аллаһы Раббыбыз Рафаил Лотфулла улының бу дөньяда яшәгәндә кылган хезмәтләрен, игелекле эшләрен кабул итеп, аны җәннәте белән бүләкләсен. Әәмиин! 🤲🏻

Фотосурәт: Рафаил Исхаковның социаль челтәрдәге шәхси сәхифәсеннән

@DUMRF_TAT  

Аллаһны күргән кебек...
Мәскәү Җәмигъ мәчетендәге вәгазьнең татарча өлешеннән өзек
Бу атнада Россия башкаласының төп мәчетендәге җомга чараларын мөфти Илдар Аляутдинов җитәкләде.

@DUMRF_TAT

Коръән нәсыйхәте
Килешеп яшә
 
وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ
 
Яхшылык белән явызлык тиң түгел. Син иң яхшы мөгамәлә белән кайтар, шулвакыт сиңа дошман булган кеше гүяки шәфкатьле бер дус [булыр] («Фуссыйләт» (аңлатылды) сүрәсе, 34 нче аять).
 
Җомга көн мөбарәк булсын!
 
@DUMRF_TAT

Үзебезнең татар
Баш мөфти шәех Равил Гайнетдин Казанда киң җәмәгатьчелек белән очрашты
2 сәгатькә бу кичәгә татар матбугаты тарихи вакыйга һәм затлы очрашу дигән бәяләмә бирде.

Мөфти Гайнетдин:
🎤«Театр белемен биргән өчен Раббыма мең шөкерләремне әйтәм. Чөнки мин анда күзләрне күрергә өйрәндем, залның тынын тоярга өйрәндем. Мәскәү югары Ислам көллиятендә имамнарны укытканда: «Залны тоегыз», – ди идем, «Сез мөнбәрдә басып торасыз, халык соңгы рәттән дә синең пышылдап әйткәнеңне дә ишетергә тиеш», дип өйрәттем.
Мин Мәскәүдә эшли башлаганда безнең залда 3000 кеше була иде. Хәзер вәгазьләремә 250 мең кеше килә - 250 мең кеше бер мәчеткә җыела. Минем телевизион трансляцияләремне миллионнар карый. Казахстан, Кыргызстан, Үзбәкстан – кая гына барсам да: «Вы не только муфтий России, вы наш муфтий», – диләр. Алар Мәскәү сүзен тыңлый, интервью алганда да: «Сездән ишетәсебез килә», диләр. Россия мөселманнарының сүзе югары!»

Интертат электрон газетасы мөфтинең чыгышын 3 кисәккә бүлеп биргән

@DUMRF_TAT

Күргәзмә ачылышыннан берничә мизгел

«Россиянең Ислам мирасы: халыклар һәм традицияләр» дигән күргәзмә Казанда, ЦУМда («Үзенчәлекле осталык үзәге») 14 сентябрьгә кадәр эшләячәк.

@DUMRF_TAT