🗣️ Zafar Hoshimov — 1968-yil 29-iyunda Toshkent shahrida tug‘ilgan o‘zbekistonlik tadbirkor. 1992-yilda Toshkent universitetida ehtimollar nazariyasi va matematik statistika yo‘nalishida tahsil olgan. Shuningdek, 1992–1994-yillarda Angliyadagi Sasseks universitetida o‘qigan. 1992–1995-yillarda „UzEX“ MChJ bosh direktori, 1995–1997-yillarda esa „Balton Trading (Asia)“ kompaniyasida biznes rivojlantirish direktori lavozimlarida ishlagan.
🌐 1996-yil dekabrda „Anglesey Food“ kompaniyasiga asos solgan. 1997-yilda ushbu brend ostida ilk do‘konini ochib, O‘zbekistonda zamonaviy supermarketlar tarmog‘ining rivojlanishiga asos soldi. 2005-yilda tarmoq „korzinka.uz“ brendi ostida faoliyat yurita boshladi. Keyinchalik „Smart“ uy do‘konlari va „Korzinka Diskont“ savdo formatlari ham yo‘lga qo‘yildi.
💬 Hoshimov faoliyati davomida chakana savdodan tashqari boshqa loyihalarni ham amalga oshirdi. 2018-yilda O‘zbekistonda ilk „FLO“ multibrend turk poyabzal do‘konini tashkil etdi. 2019-yilda Toshkentda mustaqil gastronomik loyiha sifatida „Five“ fudkortini ochdi. Shu yili Yevropa tiklanish va taraqqiyot banki „Anglesey Food“ kompaniyasiga 40 million AQSh dollarigacha sarmoya kiritishi ma’lum qilindi.
🔈 2020-yil may oyida Zafar Hoshimov O‘zbekistondagi ilk tadbirkorlik universiteti — TEAM Universityning hamasoschisi va Vasiylik kengashi a’zosi bo‘ldi. Bugungi kunda u O‘zbekiston chakana savdo sohasida faoliyat yuritgan va „Korzinka“ supermarketlar tarmog‘ini rivojlantirgan tadbirkorlardan biri sifatida tanilgan.
Telegram | Instagram | Linkedin