آذر آییندا آچیلان چیچک‌لر

قاباقکی یازی‌لاردا آذر آییندا یوْرودوموزدا باش وئرن سئوینجلی و کدرلی اوْلای‌لار هابئله بو آی ایچره دۆنیایا گؤز آچیب، دۆنیادان اللری اۆزۆلن بؤیۆک‌لریمیزله تانیش اوْلساق دا، یاخین گۆنلرده تبریزیمیز و باشقا شهرلریمیزده باشلایان فرهنگی اوْلای‌لار؛ تاماشالار، تئاترلر، کوْنسئرت‌لر و.... بو آیی داها دا گؤزل‌لشدیریب.
بو ایلین آذر- ی قارسیز - قیروْوسوز کئچسه‌ده یوردوموزون پارلاق اولدوزلاری، آذربایجانین توْزلار و کیرلی دومان‌لار ایچره بوْغولدوغونو سایمادان همئشه‌کی کیمی وارلیغیمیزی قوْروماغا جان آتیرلار.

قوْچاق‌لار یوْردونون؛
بیر طرفیندن نبی‌نین سسی گلمکده، نبی‌میز، قاچاق اوْلسا دا قوْچاقلیغی داها قاباریق گؤرۆنمکده، ائشمه - ائشمه بیییقلاری‌لاری‌لا بیرگه چتین‌لیک‌لر قارشیسیندا نئجه دیک دایانماغی اؤیره‌درک، هجر-ی بوْز آتینا اۆزرلیک سالاراق، تایسیز اوْلان سئوگی‌لرینی دیل‌لره یایماقدا.

بیر آیری طرفدن کوْراوْغلو جنگی‌لری نظمه چکه‌رک، یئددی مین یئددی یۆز یئمیش یئددی دلی‌سینی چنلی بئلدن چنلی تبریزه قوناق گتیریب، قیرآت بئلینده میسری قیلینج‌ینی الده اوْیناداراق، نیگارین گؤزۆندن ایراق، بۆتۆن آذربایجانلی‌لارین سئوگیلی‌سینه چئوریلمه‌گی‌ایله بیرگه، بو ائلین و دیلین دوْستویلا دۆشمانینی بللی ائتمکده.

جان اوْرمودا دوز داغی تاماشاسی گؤزلردن آخدیران یاش‌لاری گؤلۆمۆزه ساری یوْللاماقدا.

بیر طرفیندن داملار - تاوان‌لار تاماشاسیندا سانکی ساعدی یئنی‌دن دیریلیب مشروطه‌ دؤنه‌می‌نین اوْ آغیر و چتین گۆنلرینی اؤزۆ روایت ائتمکده.

و باشقا بیر بوجاغیندان اؤلۆلری قویلایین تئاتری‌نین چالیشانلاری، ساواش‌ین نه اوْلدوغونو آنلاتماغا چالیشماقدا.

هۆنر، بیر میللتین اویغارلیغین ( تمددونون ) زنگین‌لیگی‌نین گؤسترگه‌‌سی‌دیر و دۆنیانین ایلکین و زنگین اویغارلیق‌لاری‌نین بیرینه یییه اوْلان میللتین، هۆنری ده گۆجلۆ اوْلار،
ارک ( شیر - خوْرشید ) سالوْنونو ییخسالار دا بئله، آشیق سازینی اؤزگه بایراغینا بۆکۆب یاندیرسالار دا بئله، آنا دیل‌لی کیتابلارینی کین اوْدوندا یاندیرسالار دا بئله و وارلیغینی دانماغا جان آتسالار دا بئله.

بیری گلدی بینا سالدی
بیری ییخدی اؤدۆل آلدی
اؤتن شؤهرت هاردا قالدی
یانیق قوْپوز فیکره دالدی

آنجاق، بو بؤیۆک میللت، تاریخین ان چتین آشامالاریندا وارلیق‌لارینی قوْرویوب اوْ چتین گۆنلریندن باشی اوجا چیخیب و اینانیریق یوردوموز، یئنی‌دن ایشیق‌لارا آچیلان آیدین سحرلرله اوْیاناجاق بیر گۆن....
بلکه ده ائله آذر آیی‌نین گۆنلری‌نین بیرینده.

داودعبدی
@davud_ebdi