نه یاخشی کی سن وارسان آی صدفلی ساز [ زلیم‌خان یعقوب ]

  بیلمیرم نه‌دن آشیق آدی گلنده منیم بئینیمه چاتان ایلک یئر، تایسیز آشیق‌لار یوردو و اوْ وارلیغین سؤنمز اوْجاغی ساییلان اورمو شهری اوْلور.
منیم بو قوْنودا چوْخ آراشدیریلان علمی و بلگه‌لی قایناق‌لار و کیتاب‌لارلا ایشیم یوْخ، آنجاق تکجه اوْ بؤلگه‌نین آدلیم آشیق‌لاری‌نین آدلارینی گؤزدن کئچیرسک، اوْ گیزملی اینسانلار آشیق‌لیغین گیزملی هابئله سئحیرلی دۆنیایا نه‌دن آددیم قوْیدوقلارینی آنلاماق اوْلور.
آشیق امراه، آشیق آسلان، آشیق بولود، آشیق درویش، آشیق اوْهانس، آشیق آیواز، آشیق باهار و بوگۆن آرامیزدان کؤچن، اوْ قیزیل سوْیون سوْن بایراقچیسی اوْلان آشیق دهقان.
آشیق دهقانین آرامیزدان کؤچمه‌سی‌نین خبرین ائشیتدیگیم آندان بری، حالیمین پوْزولدوغوندان چوْخ، چاره‌سیزلیک کیمی، نییاران‌چیلیق کیمی نه بیلیم قوْرخو کیمی بیر دویغو منی چولغالاماقدادیر.
سئحیرلی و اوْسطوره‌وی سازیمیزین سوْن قوْروقچوسونون الدن وئردیگی‌نین آردیجا یارانان بیر قوْرخو.
آشیق‌لار تاریخین باشا - باشیندا، تۆرک خالق‌لری‌نین ازلی و ابدی وارلیق‌لاری اوْلسالار دا، من هئچ‌واقت قوْپوزا ساده بیر موسیقی آلتی کیمی، آشیق‌لاری دا معمولی اینسان‌لار کیمی گؤره بیلمه‌ییرم،
منیم گؤزلریم هر دؤنه سازلا سینه‌سینده سیلاحینی گزدیرن بیر آشیغی گؤرۆب ایشیقلاناندا؛ تانری‌داغ‌لاریندان آشیب، آلتای‌لاردان یوْلونو سالیب، سهند اتک‌لرینده منزیل سالان شامان‌لاری گؤرۆرم، سازلاری‌‌لا بو دۆنیا باغلانتی‌لاریندان آیریلیب گله‌جکدن خبر گتیرن اوْسطوره‌وی اینسانلاری گؤرۆرم،
هر یانیق کرم‌ینی ائشیدنده، سئوگی اوْدوندا آلیشیب - کۆل اوْلان کرم‌ی خاطیرلاییرام،
هر جنگی‌نین جهله‌مه‌سینده قیرآت بئلینده، میسری قیلینج الینده کوْراوْغلونو آنیرام،
هر گراییلی‌سی‌ایله بو دۆنیادان قوْپوب، اوشاقلیق چاغ‌لاریما قاییدیرام، هر بیر اوستادنامه‌ده اؤیۆدلر ائشیتدیگیمده آغ ساققال‌لی دده‌قوْرقود گؤزۆمۆن اؤنۆنده جانلانیر، هر دئییشمه‌ایله باغلاشمادا دده علسگری گؤرۆرم و هر دؤنه شیکسته‌ ائشیدنده غرور وئریجی هابئله قان جوْشدوروجو کئچمیشیمیزله - فاخیر تاریخیمیزی یادا سالیب کئفه دالیرام، باش ساری تئل‌ین کئفلندیردیگی کیمی بیر کئفلی‌لیک.
سؤزۆن دۆزۆ، منه بئله گلیر آذربایجان میللتیندن آشیق هاوالارینی آلسالار بو میللتین وارلیغی‌نین تمل دیره‌یی ییخیلار، بلکه ده ائله اوْ اۆزدن کئچمیش ایل‌لرده قوتسال سازیمیزی آمریکا بایراغینا بۆکۆب، جوما نامازلاریندا اوْدا چکدیلر، آشیق‌لاریمیزی دوستاق ائدیب وارلیغیمیزی قوروتماق ایسته‌دیلر.
آنجاق، آشیق دهقان و دهقان‌لار بو یوردون هر بوجاغیندان سازلارینی اله آلیب، دؤحتۆر علی قافقازیالی یازدیغیمی کیمی، هر بؤلگه‌ده یارانمیش اوْلان آشیق‌ موحیطینی قوْرویوب، بو سئحیرلی صنعتی بوگۆنۆمۆزه گتیریب چاتدیردیلار.
بو سؤزلری یازا - یازا هله ده اوْ قوْرخو مندن ال چکمه‌ییب
بلکه آشیق دهقان، ایشوْ نون *( آشیق یوسیف اوْهانسین باباسی ) دۆزلدیب ، آی - اولدوزلا بزه‌دیگی، تاریخی و تایسیز اوْلان اوْ آدلیم دؤرد سازدان بیری‌نین یییه‌سی اوْلماسایدی بوجور نییاران قالمازدیم.
آنجاق پاییزین بو قوْراقلیق گۆنلرینده آشیق دهقان، اورمو گؤلۆمۆزۆن قورودولماسی‌ایلا بیرگه، بو یورددان کؤچن دۆرنالارا قوْشولاراق آرامیزدان سس‌سیزجه‌سینه کؤچۆب، قیزیل سسی‌ایله اوْدلو نفسینی، تاریخ‌لرین یادداشینا پای وئردی.

*[ ایشو سازلاری آدی‌لا تانینان دؤرد آدلیم و تاریخی سازیمیزین بیرینی آشیق امراه جانوئیسلی آشیق میرزه‌علی نیولوئی‌یه ئرمیشدی، همن سازلارین بیری ده آشیق علی‌نین اوْغلو؛ آشیق ائیواز بابایی‌ده‌دیر، بیری آشیق یوسیف اوْهانس‌ین سازی‌ایدی، سوْنونجو ساز دا آشیق دهقانین سازی‌ایدی].

داودعبدی
@davud_ebdi