Сказка на санжинском языке.

ЧIалтукI ГIяхIмад.

Ужибцав ужиблекку ца дурхӀӱ.
Илила аттала бужибцаб маццала акь.
Атта икӀулцав дурхӀÿцце: «Дила гӀячурбе ледну, у гӀябал бар укьян маццала кьари».
«Ца муссад кӀед, — икӀулцав, — ккалкме. Варилла, вари у ихьттай эрчимагьаркӀутта!»
«ГӀяхӀле», — икӀулцав дурхӀӱ.
Агурцав цаибил бар, эрчира гьерчӀиблекку ккалкмай, кайгъибцав хъили.
КӀвиибил бар агурцав: «Цел аттал ил гьаибел?» — икӀул, пикриикӀул ужибцав.
«Ккалкмай эрчимауркӀутта!» — икӀул, эрчигьерчӀиблекку, яхӀ баркьибле.
ГӀябибил бар агурцав цӀилра, гьатира хвалле пикриикӀулцав.
«Целлий аттал ил гьаибел? Це ккалкмеял?» — икӀул.
Ужий айхубле, эрчиверчӀибцав.
Ххула къугъа гьинцбалла ккалкки бужибцаб, гьел чигьавхъунцав.
Велкъийсат укунцав.
ЦӀил далли дикъанда икӀул, дуклара дирцӀан замана — сарегъибцар бяжук.
«Гьа, — рикӀулцар, — гьежув ий, дила гьинцбе дуккан?»
Уцибле, къапле викайщибцав.
ЦӀил рикӀулцар: «Дам ариллалий хурейглий викъанда».
Ца муссад гьелила дацци дикӀвий дижибле, чиркассибле къап, агурцар къватӀагу дацци даркьарай.
Ил дурхӀÿ ттурагьавхъунцав гьел замана: къаплиццер, къаплицце къархъне дикадишшибле, дягӀяна ищибцав.
Карегъибцари икӀ, дацци чирдаркьибле, чигьассибцаб къап.
«Агь, — рикӀулцар ил, — декӀв бихубле лебкьал иж!»
«Цинна урухдехьлий декӀв ихуб урккар», — рикӀулцар.
Беркъибле ил агурцар.
Ритегъибле хъили, чиркассибцаб къап.
ЦӀа гвабикьунцаб, хӀяшак чебишибле, рурччур гьадигарайсат, карижибцар.
Рурччур гьадижибкъел, къап чарбикабаркьибцаб хӀяшукка.
Къаплиццер къархъне ттуракадегъибцад.
ГӀясирихубле, ил вяврикӀулцар дурхӀуцце: «Чинавде у?»
«Ат дул цикӀал абиркъандан, ваше!»
ДурхӀу икӀулцав: «Ду ала сундуглев вивлевда».
Ачбаркьибцаб сундуг, эррикарикӀулцар — вакку.
ЦӀилра вяврикӀулцар: «Ва дурхӀӱ, ат дул цикӀал абиркьанда».
«Ваше, ттура, ваше! Чинавдел у? Бурса!»
ДурхӀу икӀулцав: «Ду ала никӀа тӀуплев вивлевда».
Хъяшкагъибцаб цинна никӀа тӀуп — вакку.
ЦӀилра рикӀулцар, гьатира гӀясирихубле: «Чинавдекква у, бурса?»
ДурхӀÿ икӀулцав: «Ала хӀяшуккав вивлевда».
ХӀяшукка чегурре, ит эррикаруркӀулцар — вивхевел.
Гьел замана тяхӀсаухъунне дурхӀу, къуртрикараркьибцар гьел хӀяшукка ри.
ХӀяшуккар рурхъян гьинниццер ил ребчӀибцар.
ЦӀил дерчибле цинна маццара, агурцав хъили.
Таман.