ГIиникъла мякьлаб дугели ч. 1

Ил бархIи шантани ракла изайзивад вебкIибси Батир хIяблавариб. Кьанни, цIябдеш тамай тIинтIкабиубла. ЧIумати шурмазиб хIяб буркъес гьамадли ахIенри, набтла чиргъмира пайдаладарес чебуркъуб.
Жамав хъули чарухъун. Я хинкIи дирули рархибси хьунул, я, стол-алав чукурбиубли, дурсри хIядурдирути дурхIни чехIебаиб. Саламра хIегили, дивайчи чIикьитIун. БекIла уди някъбира кайхьили, декIли гьигьухъун.
ГIяйшатли гьала-гьала муруйчи гIяйиб хIебариб: бебкIа-бялгIяличивад чарухъунси гьарил адам пашманти пикрумазив вирар, гIyp ил хинкIа укес кьабулхIейкибхIели ва сунечи гьалав кьяйда ванали хIерхIейкIухIели, илис тамашабизур.
ЖамавкIун илгъуна хIейри.
Дай дугила замана хапли ГIяйшат уркIрухъун, чераргъиб.
- Аризи! - къужикIулри илизи ухьала дублав тIашси, кьяшмачивад бекIличи бикайчи вегIиубси мурул.
- Се биубли?! - ахъбуцили юргъанра, ГIяйшат харчризур. Илис ил манзил рахъхIи зягIипси сунела неш гьанрикиб. ГIергъиси замана урцецунала изай ил кIина аргъайзирад рухъахъири. РубкIули бара калири. Рахли изала сагали шикьсабухъи хIебиалли?
- Палтар чесадуца, - рахIятсири мурулла буйрухъ.
- Жан Жамав, се бетаурли? УркIи баргудулигу? Неш? - вякьризур ил.
- Юх...
ГьатIи дубхIехъили, ГIяйшат регIриуб. Муруйчил илала жалти хIейри, ил викIуси хIебарес асубирар ибси гьанбик илизиб агарсири.
Илди шила дубла аркьуси гьунчи дурабухъун.
Бац шалабикIуси дуцIрумла ванаси дуги биалра, ГIяйшатла хъуцIрумачиб балала кIана лебри. Жамавра, тяп гьарахъси архIяличи дуравхъунсиван, вегIиублири. ХъапIни делгIунси сура курткара кьапIара бекIлил чучи хIяжатдеш агарти палтар сарри.

#чтение