📝 Пагьмучев Багьадур
Шаладичивкъел урши талхъанна гьетин вегурца. Чиваживгван талхъанжи Багьадур гӀяхӀкиццурца. Талхъан викӀулца: «И дул гӀячулцци урцанди, дила суалтай жабавти деккара вигьаттал». Багьадур кьабулвичивца. Талхъанни уршилцци гӀябал суал хьардегъивца:
1️⃣Ция гьеж дунелцци багьлара кӀантӀици? Урши икӀулца: «Имс диг».
2️⃣Ция дунелцци багьлала биццици? Урши икӀулца: «Чиркалла анкӀала».
3️⃣Ция дунелцци багьлала гӀяваци? Урши икӀулца: «Гванза».
Сукли цинна суалтай деччив жабавталжи талхъан уркӀухъунца. ЦӀил икӀулца: «Бурса, гьари, чил дагьухурай ицци гьелтти цикӀал?» Урши икӀулца: «Ниссала шилцци вити дахъил делчӀун гӀялимли».
Талхъанни Багьадур цинна мярццалла кьариш варивли катурца. Багьалжи гьежгван мушугьар баривца: «Эгер ил, дус кабичивкъел гьеж дила барулла чевттар чум мярцца чиихьвара вигьатталра, гьелтти ила диргьвар. Дуссела бакни палтарра диранда, чӀвакьаннира валханди».
Урши разивичивца.
Талхъанни гьар бари Багьадуржи чӀвакьара, няхӀла шишара, гваргварла чӀвел бекӀра кадирхьул дуживца. Багьадур талхъанна гӀямалталжи шаквичивца. ЧӀвакьара, няхӀла шишара дуччулца, гваргварла бикӀи гьелин мякьи бити миккввала ккалкканна ямпилгу гункадартул уживца. Уршилли баргьул уживца, гваргварли гьунар букьахан, чархла гьахъри камбиргьахан. Ил илеци ислел гьет гӀялимли бурсибилди. Гьелттягьялли Багьадур ца дус улши талхъанна мярццалла кьаришли.
Дус дичивкъел, талхъан даршал мярццара азбанни дижкагъивли, Багьадурцци икӀулца: «Гьари, урши, нихьвала вягӀда бекӀбарара замана цебегъивца. Гьари ила ци гьунар биял баргьанда. Чум мярцца барулла чевттар чиихьвара вигьватталра, гьелтти сукли ила ца». Багьадурли хъячӀ авичивли, ца-цал чиихьул, барулла чевттар гӀявцӀали мярцца ишурца. Рахли сукли чиихьу икӀул, талхъан урухвигьявли, урши тӀашагъивца: «На, урши, гьихъу!»
Уршилли гьигь гьабатурца ва тӀашкиццурца. Талхъан икӀулца: «Дам гьанбичив, ил чӀвел бекӀ гваргварла гьар бари дуканкъел, ила гьунар акулган икӀул». Урши икӀулца: «Эй, талхъан, дул гьетти ила багьсар хьардегъив суалтай жабавти деччивкъел шак авичивдив дул биранилжи? Дул ила гваргвар гьет микквала ккалкканна ямппилгу гункадатурда. Чибигулдив гьет бугъял шикьбишивли. ЧӀвакьара няхӀра дуччади».
Талхъан уршилла пагьмулжи мяхӀталвигьявца. ЦӀил икӀулца: «Дила исбагьи рирси этти риккан баргьулда дул. Дила уршира вейкура. Рирсилжи магьарра биранда. Ира дила уршигван ужи. На ду вихънавегъивда. Дила талхъандехьра этти луканда».
Багьадурли разивигьявли, цинна атта-абара гьелин качивца, талхъанна рирсира кариживца, разил къугъал гьербиргьул калгунца.
Гьетин гьеттира белди разил, дура гьежин цегъивда.