📝 Пагьмучев Багьадур
Буживца биллира-бейквалли ца пачалихъци гьуна-биккал цалжи ца бикканти, цӀакьли цанхӀеберхурти сув-хьулун. ВецӀну чӀура дус барх гьербиргьулхьалли, илтталла дярхӀя уживли аккура. ВецӀну чӀура дус дичивли гьерегъ, Аллагьли илтталла балкни кьубулдаривца ва илтталла гьачӀухурца ца урши. Разибигьявли илтти, дуччи-эри Аллагьцци булккунни, Аллагьцци шукру бикӀул калгунца. Уршилжи Багьадур гьадишивца. Илтталли ил ихӀялли гьикьунца, хвалавейхивца. Урши вецӀал дус вигьявкъел, гьел чула ца камти мярцца дучивли кьари ваши. Ил цӀакьли духуци, пагьмучебил, духуци, цинна атта-аба цӀакьли биччахан, гьелттала хӀурмат биран урши уживца.
Гьел кьари вахьан диркьалла мякьигван ца цакьли цикӀал баргьан, хвала багьуттичев гӀялим хӀервиргьул уживца. Гьелеса гӀякьлу чибурсахара бахъил укка цабаши. Багьадурра гьелеса гьар бари ваши. Багьадур цӀакьли пагьмучебил урши вигьнилжи гӀялим шаквичивца ва ил илей гӀяхӀкиццурца. Ил уршилццир уртахъиццурца. ГьелтяхӀялли кьарира вахьул, гӀялимсара вахьул Багьадур вецӀну гаъра дус вихӀявца. Ца бари Багьадур цинна багьинталцци викӀулца: «На дила дикканти, ду хвалавегъивлида, дила гӀямрулцци къаршидирканти дахъил цикӀалжи гьет гӀялимлира нишшалра урсиваривда. На ду дила яшав никӀва гӀяхӀкабигьахара, гӀякьлура имцӀабигьахара, дунейра чибагара, ттураурххулда гӀярххялжи». Атта-аба бусравбикӀулхьал хъил ужахара, ил уживли аккура. Абал Багьадуржи хьуней дерквана чӀвакьара кадишивца, вакьагурли урши ттураверххурца. Аллагьцци булккунни аталра абалра вархьваривца.
Багьадур чумал бари вахьул, вахьул, ца талхъан хӀервиргьан шагьарцци вегъивца. Дярххя дегъивкъел ил шилла баъи бити бурххалци ширабаривца. Гьелин ца рихъна царигинал хӀерриргьулди. Ил цӀакьли урчӀецӀичев рихъна царичив. Илел Багьадур разил шираварив, чӀвакьанни вахун, цӀил Багьадурци цилжи ттураверхурилал хьарбегъив. ДярхӀялли цинна мурад бурсивца. Гьел рихънал бурсивца, чула шилцци талхъанжи кьаришдехь дарижил ца гӀяхӀ мейдан важивца рикӀул.
#чтение