Гьилкьяйда, цайкъа цурали цIумикIули, цунли убкIанири хIу, кашиш — гIясили някъ гьакIбикьули дирар абаан, шаб либтигъунти рурсбēла гIяхIтира вайтира шалуби сипатдякьибларгIи, дичулти гъайли гIурра пайда ахIхибхIили. — ЦIахлиригва шантēла гьалав! Балуллив гьилди хIуд си бикIулел?
ГIя, дишила гьил сабабли шаб ахIбурул ахIбирар. ГIяхIна бӣши кьалли, гьарил дила шанли гьиш нуниъван цулбēла гIилаб лидзми туснакъбикьани бēлири, амма, сунна вагI ибш, гьил чула гIилаб тIашаисцад цулби гьарилла кьаклизирра къаршехIдирхьур кьадин.
Гьилбагьандан бис гьил, бис хайрехIбирул дазура уббатулли, дурахьабулхъул. ДикIарил къуллукъри, рахли, аба дикIулиъван, шантēла гъайли дизибадгIилли адамъили италгьихъани бēлири, амма си бякьис ирарā, рахли ну алкIухIилел гьишгъуна "цIа дурахIдулхъанли" āкIунил эсли.
Гьеч, биур, гьиш гьакIлисалла "цIа" дурахIдухъухъуй хьалли асвахIбирар, сенахIинну гьих рурсили дила уркIи сен сабрел буссягIят суничу битIакIихъиб. Ну тIама лугIянбӣхъис хъахI-хъахIра бушили, рурси гIиладяхI чардибхIейс хIядурикIвисхьайъира. Гьала-гьала дяхIумцIайчу кицӣли, дизиб джагвадишла шайзиб битагьурил барсдиш агурал гьӣлизи хIаризурра, амма, дяхIумцIай бархьдиш дигIянабякьис кьасахIбякьиб ва тIанилгъуна хъвяблишиб бадзъван шалабикIул хвалал гидгаригъуна бикI либ тяхIялли диши вякьбизухъур. Гьалли хIулбаши шихьадаибти хъаджла рангти нудбаурад гаталаъван гъурша хIулби цIивдизулли сари.
— ХIу дишивад шивирхви, — хапли шихиб дила къакъла гIилабад гьил мандзиллизиб, — гьилиини ардукьяс гьалар ундза гIиларадра гIикIили дуули сари.
Ну хъярхъли ласвяхъяра ва рурсила дукардихIвяти хIулбаши хIар бархьбизулли, дила чIумъал кьаслишила гьитмадан хъумартурра.
— ХIу...хIура санаторийлизи дакIибиллив? — намра хабарагули дурабихьиб, урхIла тIамаличул.
— ГIя, ну гьишкIу даґ дакIибилла. ХIу кьинна, шибиуйши мишули, гьашкIув вахъхIе ӣли урґуд?
— АхIинна, нура даґ сайра вакIибил. Дуґи кьӣ-кьӣ сāира.
— Дуґи!? Дуґи хIукIун гьинтаъван лезгинкализи хьавхъуй тясикIули итухъуй ливри. ХIуши хIаръибхIили, нам хIу гьишкIувил "культмассовик" сайрēра или гьанбихьибилли.
Ну каниралла агварти дукарцIиличул дукарвяхIяра.
— Бархьли бурасли, ну дилхъла-дикIар гьилгъуна урибил устара ахIинна. Дирхагьадлира, ахIагьадлира, нуни гьилди дила гIвямрулизир бегI гьалар дякьибти дилхъ сарри.
— АхIбēли, дуґилиши бихьараши идбаглиъван гIвямру диркIили, дуґили илбисла гIямултау ихьили валанни.
— АхIин, анцIбукь гьилъвай-дикIар ахIин. Дуґилис гьаларра нам дилхъ-далай дигули ирира, амма нуъван ахIи нам царилти имцIали пагьмушибтили билзан, гьилбагьандан, ца шайшив тIашизулли хIарикIни имцIали яликьли шибиус.
ВяхI! ТамашāхIину гIади, гьанахIала ур дичул къаршидихьибил хьунул адамӣчу гъай дарґис ахIирули лихIхьайхъвял ну, гьанахIа дуристи таманахIдирули итухъуйра.
— АхIбēли, дуґи гьитцад гьит майдайшив хIуъван пагьмушив чалла уулēхIину? — дукарцIилишӣхьибил тIамали иб рурсили.
— Вари, вари, гьилъвай ахIинни! Дила вайяхIра милладякьили, царилташи хIарикIусра или дуравхъунилли. Мяваличу кицахIӣли ливай дила улкала макьам зяйбухъун. МаджяхIят, гьиткIув, Дягъистайзив эслилли дизир гьилдигъунти гъвабзадиш дакIудухъиши, амма гьишкIув, намра хабарагули, мявала байълив вагьарӣра. Ца бархIи хьалли шехIбаибил, гьитцадра адамъили вагIла гвандзалиши карцIирни ахIбагьурра.
#хабурти
✏️ Грамматический очерк Урахинского диалекта
🔘1. Первая страница навигации
🔘2. Вторая страница навигации
🔘3. Третья страница навигации
#️⃣ Хештеги по темам
✈️ Даргинский язык. Урахинский диалект.