Ундзализи хапли кьутӀдяхъябхӀили, ну палтарра ширахIхьадатулли караватлиши гвирухъуйри. Хъярхъли харчизурра ва, буруш-гIвянила ункъдякьили, , ундзаличу ласвяхъяра.
— ГӀя, гӀя, асубирар!
Умъудиш ахтардибякьис лиркьвял нушила хъали ушкул духъна дурґар или гьанбихьиб, ва гьӣлила къвянкълишибад жибжирбухъунил гӀвябигъуна чинтӀ мурт гьаббикӀурал или хӀаллира. Огьогьой, дахъ кьяркьилла саригва гьил! ЧӀянкӀудякьили ца нушила хамхалишицун ахIбēли, гьӣлиини ишбархӀи нушила хъулиб хIарахIбякьибил мир батурил ахӀин. АхӀбалас гӀурра си либли гьил гьишкIу лиркьянел. Дичул варх хӀаиррул Кимлис бēли, бикӀлил мугьлатдиш битуґулēхӀин. ИшбархӀи гвӀяннучӀ адацӀибмад, чинтӀра лагра хьатра тярхӀбикӀухъули, сунтӀдикӀвисхьадиибилли.
ГӀурра хъулиб папруз битӀакӀирив? Кьяркьли хьарбаиб гьӣлиини Кимлизи.
— Ягъари, си дикIванире хIу дикIалла? — мугIялимла гьалаб учIайъинъван къакъла гӀила папрузра дигIянабикьули, марис кьасбякьиб Кимли.
— Папруз каниб битIакIаслилла, гвягI хъули гвачбирули ахIбисгва? Хъви бикьус, хъулиб нуни ишбархӀи папрус битӀахӀакӀира или.
Дирхалгьулла, дирхалгьулла. АхӀбēли гьилди къакъла гӀиларад дурадулхъути гав хӀула дурхъадишла нур дурґар...
ГьикӀ анцӀбукь ишбархӀи гӀвяннучӀ бӣбилли, гьанахIа кьинна ну генерал айцӀухӀили солдатъван вархьӣли тӀашизуллира, амма гьиш гьакӀлизир лирил сикӀал сен-сарел ну хӀаллēхӀинил шайшидяхӀ ласдухъун.
УндзалигӀирад ца хабаллира дурис ахIӣсил къуймур гьардакӀиб. Нуни хӀулби хӀвяшдякьира ва сагадан гьилкIу хӀаръира. Гьеч, нам селла гьанагьулли ахӀинни. Джагвати цулбēла царугил къвярра гьаббакӀихъили, рурси ахъли дукардяхӀяб.
— Шивирхви, хӀула бикӀликира, — хъули адицӀули иб гьӣлиини, — дичу дарх хIардирул хьунул адамӣ нушила хъā ибкла (🔑) суничу барх арбухили сари. Нам кьинна гьилкIу адацIис гӀягӀнили хьалли, дирулēхIинна.
— Силишивли кумеклайгьис ируса?
— Гьеч, селла гIягIнилēхIин. Ну хIушила мякьлибил хъулир хIардиранира. Нуша кIвибахIлалла ундзурби ца балкуйши хIардикIванти сари. Рахли асубирāли, хIушачураддихьили дила хъули адицIус.
— Хайрибирар гъари.
Нуни гьишкIу вакIис гьалаб мутIрусли билгIвяхъвяй дяхIумцIалаъван бархIē нур гьиткIу-гьишкIу пархдикIухъули лямцIбикIул бикIлишибад пашмай някъ шидибиркIира. Сунна вагI ибш! ГьишкIу ливкьни балули, шини сабē гьил лугIвяхъянелла? ХIеб сарину, бикIла кам гьигьбикIвихъис или билгIвяхъвянилли. Гьил билгIвяхъвяннаргIи, дичу гIибла бархIи районолизирад "хIуд гIягIнил путевка либну, къалабали ваши" или, зянкъдяхъябтири.
Ункъли балъбихьибил цIуба клеш-шалбалла кьялубира пялхъдикIухъули, сигъуна-сабрел дурхъал одеколонна гвягIра пухIбухъухъуй, рурси дила мякьлирад шалгIирдухъун. ну кьинна, макьлатIисла битIакIибил гIвябулъван, гьилис гIиргIи ласвяхъяра. ГьанахIа гьил сунила хъули адицIур, сунис гIягIнил āсили, сагадан дила хъулираддихьили аркьян. Си бикьанē? Муръул адамъулачул гъайикIухIили, нуни буссягIят силишила-дигара гъай дурґули ирус, амма хьунул адамъулази гъайикIвис дила гъвабзадиш сен-сарел мурталла ахIдиули дирар: гьилдилизи гъайикIули вахIихьасли, дила гъайла лугIи гьитмадан хьабурхули бирар. ВяхI, маллира, мурталла гьишъвай цайли хьалъанирав? ГьанахIа хIябцIали дуслиши кицирулла, амма дунēла гьил шайшибил нигIмат нам баибил ахIин.
#хабурти
✏️ Грамматический очерк Урахинского диалекта
🔘1. Первая страница навигации
🔘2. Вторая страница навигации
🔘3. Третья страница навигации
#️⃣ Хештеги по темам
✈️ Даргинский язык. Урахинский диалект.