#murojaatlar_doimo_etiborda

Oliy Majlisi Senatining Mudofaa va xavfsizlik masalalari qoʻmitasi masʼullari Bojxona qoʻmitasida boʻlib, sohada jismoniy va yuridik shaxslarning murojaatlari bilan ishlash holatini oʻrganishdi

Bojxona qoʻmitasi Raisining birinchi oʻrinbosari Gʻ.Nasirov tomonidan Senat qoʻmitasi vakillariga bojxona organlarida murojaatlar bilan ishlash tizimining tashkil etilishi va bu borada amalga oshirilayotgan ishlar haqida batafsil maʼlumot berildi.

Taʼkidlanishicha, soʻnggi besh yil davomida bojxona chegaralari orqali harakatlangan fuqarolar, avtotranport vositalari va turistlar soni uch barobarga oshganiga qaramay, 2026-yilning toʻqqiz oyida fuqarolardan kelib tushgan murojaatlar soni oʻtgan yilning shu davriga nisbatan 3,3 foizga kamaydi. Jumladan, 2025-yilning yanvar–sentabr oylarida jami 2 739 ta murojaat kelib tushgan boʻlsa, 2026-yilning shu davrida bu koʻrsatkich 2 647 tani tashkil etdi.

Joriy yilda kelib tushgan 2 647 ta murojaatning 1 879 tasi, yaʼni 71 foizi ijobiy hal etildi. 737 ta murojaat boʻyicha qonunchilik talablari yuzasidan tushuntirishlar berildi. Bundan tashqari, 26 ta murojaat tegishliligi boʻyicha boshqa idoralarga yuborildi. 5 ta murojaatni koʻrib chiqish qonunchilikda belgilangan asoslarga muvofiq tugatildi.

Shuningdek, mehmonlar “Call-markaz”, Markaziy bojxona laboratoriyasi, Rasmiylashtiruv hamda Targetlash markazlari faoliyati bilan ham tanishdilar. Bunda fuqarolar va tadbirkorlik subyektlarining murojaatlarini qabul qilish, ularda koʻtarilgan masalalarni tegishli tartibda koʻrib chiqishda ushbu raqamlashtirilgan markazlarning ahamiyati haqida maʼlumot berildi.

Muloqot davomida Senat a’zolari tomonidan murojaatlar bilan ishlash samaradorligini yanada oshirish, fuqarolar va tadbirkorlik subyektlari tomonidan ko‘tarilayotgan muammolarni o‘z vaqtida va to‘liq hal etish hamda ushbu yo‘nalishdagi ishlarni takomillashtirish yuzasidan tegishli ko‘rsatmalar berildi.