#xalqaro_hamkorlik

Bojxona qo‘mitasida Xalqaro savdo markazi vakili bilan uchrashuv o‘tkazildi

O‘zbekiston Respublikasi Bojxona qo‘mitasida Yevropa Ittifoqi tomonidan moliyalashtirilayotgan Xalqaro savdo markazining (XSM) “Ready4Trade Central Asia: Transkaspiy transport koridori orqali farovonlik sari yo‘l” loyihasi doirasida Sharqiy Yevropa va Markaziy Osiyo davlatlari bilan hamkorlik bo‘yicha rahbari Yelena Butrimova bilan uchrashuv bo‘lib o‘tdi.

Uchrashuv davomida O‘zbekistonda savdoni rivojlantirish, savdo va transport jarayonlarini takomillashtirish, shuningdek, bojxona sohasida amalga oshirilayotgan islohotlar doirasida o‘zaro hamkorlikning ustuvor yo‘nalishlari muhokama qilindi.

Xususan, Qozog‘iston Respublikasi bilan “Uzluksiz tranzit” tashabbusini amalga oshirishning joriy holati va istiqboldagi vazifalar, Tojikiston Respublikasi bilan tovarlarning kelib chiqish sertifikatlarini elektron shaklda almashish bo‘yicha pilot loyihaning amalga oshirilishi, shuningdek, O‘zbekistonda integratsiyalashgan xavflarni boshqarish tizimini joriy etish hamda davlat chegarasi orqali o‘tkazish punktlarida elektron navbat tizimini modernizatsiya qilish masalalari yuzasidan fikr almashildi.

Shuningdek, bojxona va savdo-transport jarayonlarini raqamlashtirish, ilg‘or xalqaro tajribani joriy etish hamda tahliliy yondashuvlardan samarali foydalanish borasidagi hamkorlik istiqbollari ko‘rib chiqildi.

Tomonlar mazkur yo‘nalishlarda o‘zaro manfaatli hamkorlikni izchil davom ettirish, kelishilgan tashabbuslarni amaliy jihatdan ilgari surish hamda hamkorlikni yanada rivojlantirish muhimligini ta’kidladilar.