Rahbarlar qabullarini raqamlashtirish masalalari muhokama qilindi

Toshkent viloyati bojxona boshqarmasida O‘zbekiston Respublikasi Prezidenti Xalq qabulxonasi yetakchi inspektori I.Mavlonov ishtirokida uchrashuv o‘tkazildi.

Unda Prezidentning 2026-yil 1-apreldagi PF–51-son Farmoni ijrosi doirasida davlat organlari rahbarlari va ularning o‘rinbosarlari tomonidan o‘tkaziladigan shaxsiy hamda sayyor qabullarni raqamlashtirish bo‘yicha joriy etilayotgan yangi elektron tizimning imkoniyatlari muhokama qilindi.

Qayd etilishicha, mazkur tizim orqali qabullar o‘tkaziladigan sana, hudud va manzil haqidagi ma’lumotlarni elektron shaklda kuzatish hamda nazorat qilish imkoniyati yaratiladi.

Shuningdek, uchrashuvda Prezidentning Virtual qabulxonasi orqali kelib tushayotgan murojaatlar bilan ishlash, ularni ko‘rib chiqish jarayonlarini raqamlashtirish va ijrosini samarali nazorat qilish masalalari yuzasidan fikr almashildi.

E’tiborli jihati, mazkur yangilik va o‘zgarishlar dastlab Toshkent viloyati bojxona boshqarmasi misolida amaliyotga joriy etildi.

Uchrashuv yakunida aholi murojaatlari bilan ishlash sifatini yanada oshirish hamda raqamli imkoniyatlardan samarali foydalanish bo‘yicha tegishli tavsiyalar berildi.