AQSh Bojxona va chegara xizmati delegatsiyasi O‘zbekiston bojxona tizimi faoliyati bilan tanishdi
AQSh Bojxona va chegara xizmati Milliy targetlash markazi delegatsiyasining O‘zbekistonga tashrifi doirasida ikki mamlakat bojxona xizmatlari o‘rtasidagi hamkorlikni yanada kengaytirishga qaratilgan qator uchrashuv va amaliy tashriflar o‘tkazidi.
Xususan, 23–25 sentyabr kunlari delegatsiya aʼzolari Bojxona qo‘mitasining “Ayritom” va “Yallama” chegara bojxona postlari hamda Milliy kinologiya markazi faoliyati bilan yaqindan tanishdilar.
Chegara bojxona postlarida mehmonlarga bojxona nazoratini tashkil etish, zamonaviy axborot texnologiyalarini joriy etish, xavflarni boshqarish tizimi hamda bojxona jarayonlarini raqamlashtirish sohasida amalga oshirilayotgan ishlar taqdim etildi. AQSh vakillari mazkur yo‘nalishlarda erishilayotgan natijalarni yuqori baholadilar.
Uchrashuvlar davomida transport vositalarini inspeksion-ko‘rik majmualari orqali nazoratdan o‘tkazish, rentgen tasvirlarini tahlil etish va xavflarni aniqlash bo‘yicha mutaxassislar malakasini oshirish maqsadida ikki mamlakat bojxona xizmatlari o‘rtasida qo‘shma o‘quv kurslarini tashkil etish masalalari muhokama qilindi.
Tashrif doirasida AQSh delegatsiyasi Bojxona qo‘mitasining Milliy kinologiya markazida ham bo‘lib, markazning moddiy-texnik bazasi, xizmat itlarini tayyorlash tizimi va xalqaro o‘quv salohiyati bilan tanishdi.
Markaz faoliyati yuqori baholanib, kelgusida AQSh Bojxona va chegara xizmatining Kinologiya xizmati delegatsiyasining O‘zbekistonga alohida tashrifini tashkil etishga qiziqish bildirildi.
Shuningdek, AQSh Hukumati ko‘magida Milliy kinologiya markazi bazasida mintaqaviy o‘quv kurslarini tashkil etish imkoniyatlarini birgalikda o‘rganish bo‘yicha kelishuvga erishildi.
Eslatib o‘tamiz, mazkur uchrashuv Bojxona qoʻmitasi raisi A.Mavlonovning AQSh Bojxona va chegara xizmati komissari R.Skott bilan oʻtkazgan ikki tomonlama uchrashuvlarida erishilgan kelishuvlarning amaliy davomi hisoblanadi.
Mazkur tashrif O‘zbekiston va AQSh bojxona xizmatlari o‘rtasidagi amaliy hamkorlikni yanada mustahkamlash, ilg‘or tajribalar almashinuvini kengaytirish hamda kadrlar salohiyatini oshirishga xizmat qilishi bilan ahamiyatlidir.