Surxondaryo viloyati bojxona boshqarmasida tashqi iqtisodiy faoliyat ishtirokchilari bilan ochiq muloqot tarzida uchrashuv o‘tkazildi. Unda vakolatli iqtisodiy operator maqomi, uni olish mezonlari, taqdim etiladigan yengilliklar hamda sohadagi so‘nggi qonunchilik yangiliklari atroflicha muhokama qilindi.
Tadbirda Bojxona qo‘mitasining Tadbirkorlar faoliyatini qo‘llab-quvvatlash boshqarmasi mas’ul xodimlari ishtirok etib, vakolatli iqtisodiy operator maqomini olish tartiblari, ushbu maqom doirasida beriladigan imtiyozlar hamda bojxona rasmiylashtiruvini soddalashtirish mexanizmlari yuzasidan tushuntirishlar berdilar.
Ta’kidlanganidek, O‘zbekiston Respublikasi Vazirlar Mahkamasining 2026-yil 4-avgustdagi 430-son qarori bilan “Vakolatli iqtisodiy operatorlar to‘g‘risida”gi nizomning yangi tahriri qabul qilindi. Mazkur hujjat ishonchli tashqi iqtisodiy faoliyat ishtirokchilarini har tomonlama qo‘llab-quvvatlash, ularga bojxona tartib-taomillarini maksimal darajada soddalashtirish va yangi qulayliklar yaratishga xizmat qiladi.
Muloqot davomida vakolatli iqtisodiy operator maqomini olish maqsadida Bojxona qo‘mitasiga ariza topshirgan “Termez Heritage” MChJ faoliyati qo‘mitaning mas’ul xodimlari tomonidan joyiga chiqqan holda bevosita o‘rganildi.
Shuningdek, tadbir doirasida viloyatning yirik korxonalari — “Termez Cargo Centre” MChJ hamda “T Oil” MChJ tomonidan ham vakolatli iqtisodiy operator maqomini olish uchun arizalar topshirildi.
Muloqotlar chog‘ida korxonalarning ishlab chiqarish va logistika salohiyati, tashqi iqtisodiy faoliyat yo‘nalishidagi ko‘rsatkichlari ko‘rib chiqildi hamda kelgusida ushbu maqomning berilishi tadbirkorlik faoliyati samaradorligini yanada oshirishiga oid masalalar yuzasidan atroflicha fikr almashildi.